ر ا جن پور(آن لائن)جنوبی پنجاب کے ضلع راجن پور میں 8 سالہ لڑکی کی 27 سالہ شخص سے شادی کی کوشش پولیس نے ناکام بنا دی۔ پولیس نے شادی کی تقریب پر چھاپہ مار کر لڑکی کے باپ اور بھائی کو گرفتار کر لیا جبکہ دولہا اور نکاح خواں موقع سے فرار ہونے میں کامیاب ہو گئے۔ پولیس کیمطابق کوٹ مٹھن میں 8 سال کی بچی کی 27 سالہ شخص سے شادی کرائی

جا رہی تھی۔ بچی کے والد اور بھائی کے علاوہ دولہاکے 2 بھائیوں کو بھی گرفتار کر لیا گیا ہے، فرار ہونے والے دولہا اور نکاح خواں کو گرفتار کرنے کی کوشش اور تحقیقات جاری ہیں۔واضح رہے کہ پاکستان میں کم عمری کی شادی جرم ہے جبکہ 18 سال سے کم عمر کے بچوں کی شادی کرانے والے والدین کو 2 لاکھ روپے جرمانہ اور 3 سال قید کی سزا ہو سکتی ہے۔

موضوعات:شادی