لاہور(این این آئی)پاکستان لینڈ پورٹ اتھارٹی کے قیام کیلئے اظہار دلچسپی کی درخواستیں جمع کرانے کی تاریخ میں توسیع کر دی گئی ۔ایف بی آر نے واہگہ ،طورخم اور چمن باڈر پر بین الاقوامی تجارتی اور ٹرانسپورٹ لاجسٹک سے متعلق کاروباری عمل کی صلاحیت میں اضافے کیلئے

پاکستان لینڈ پورٹ اتھارٹی کے قیام کا فیصلہ کرتے ہوئے اتھارٹی کے قیام اور آپریشنلائزیشن کیلئے مشاورتی فرمز اورکنسلٹنٹس سے درخواستیں طلب کی تھیں جن میں 2جولائی تک توسیع کر دی گئی ہے۔تفصیلات کے مطابق ٹرانزٹ مرکز کے طور پر اس کی مکمل صلاحیت سے فائدہ اٹھانے کے لئے پاکستان نے انیٹگریٹڈ ٹرانزٹ ٹریڈ مینجمنٹ سسٹم کا آغاز کیاہے جس کا مقصد تجارت خصوصاً برآمدات میں اضافہ اورکاروباری لاگت میں کمی کیلئے کاروباری مسابقت اورسہولیات میں اضافہ کرنا ہے ۔بین الاقوامی اورٹرانزٹ ٹریڈ میں حائل رکاوٹوں میں پیچیدہ بارڈر کراسنگ ، کسٹم طریق کار اوربندرگاہوں پر موجود ناکافی فزیکل انفراسٹرکچر سہولیات شامل ہیں ۔ ان رکاوٹوں پرقابوں پانے کیلئے حکومت پاکستان نے ایشیائی ترقیاتی بینک سے طورخم ،چمن اورواہگہ کے تین بارڈر کراسنگ پوائنٹس کی تعمیر کے لئے قرض حاصل کیا ہے ۔ سرحدی پوائنٹس پر مختلف ایجنسیوں کے زیرانتظام سہولیات کی نگرانی اور دیگر اندرونی خشک بندرگاہوں پر سامان اورلوگوں کی سرحد کی دونوں جانب آمدو رفت کی مربوط نگرانی کیلئے پاکستان لینڈ پورٹ اتھارٹی قائم کی جائے گی اس کا کردار بین الاقوامی سرحدوں سے سامان ،لوگوں اور گاڑیوں کی موثر اوربروقت آمدو رفت کو یقینی بنانا ہوگا ۔ جس کا مقصد بین الاقوامی تجارتی اور ٹرانسپورٹ لاجسٹکس سے متعلق کاروباری عمل کی صلاحیت میں اضافہ کرنا ہے ۔

موضوعات:ایف بی آر