اسلام آباد(این این آئی)ایم کیو ایم اور متحدہ اپوزیشن میں تحریری معاہدہ طے پاگیا۔ذرائع کے مطابق ایم کیو ایم کے 2 وفاقی وزرا سید امین الحق اور فروغ نسیم اپنے عہدوں سے مستعفی گئے ۔ذرائع کے مطابق ایم کیو ایم کے دونوں وفاقی وزرا فروغ نسیم اور امین الحق نے اپنے

استعفے وزیراعظم ہاؤس بھجوادیے ہیں جس کے بعد ایم کیو ایم اب باقاعدہ کابینہ سے علیحدہ ہوگئی ہے۔ذرائع کے مطابق ایم کیو ایم کے دونوں وزرا نے اپنے استعفوں کی توثیق رابطہ کمیٹی سے کرانے کے بعد استعفیٰ جمع کرایا۔واضح رہے کہ تحریک عدم اعتماد سے پہلے اپوزیشن کی جانب سے وزیراعظم عمران خان کو بڑا سرپرائز دیا گیا اور بڑی حکومتی اتحادی ایم کیو ایم نے بھی اپوزیشن کے حق میں ووٹ دینے کا معاہدہ کر لیا۔ایم کیو ایم اور اپوزیشن میں معاہدے کی تصدیق بلاول بھٹو اور فیصل سبزواری کی جانب سے بھی کی گئی ہے۔فیصل سبزواری نے کہا کہ ایک معاہدہ ہونا ہے، ایک ایک نکات پر سیرحاصل بحث ہوئی ہے، معاہدے کے تمام نکات عوامی ہیں، رابطہ کمیٹی سے معاہدے کی توثیق لیں گے ،پیپلز پارٹی اپنی سی ای سی سے توثیق لے گی۔واضح رہے کہ ایم کیو ایم کی حکومت سے علیحدگی سے حکمران اتحاد کی تعداد 164 جبکہ متحدہ اپوزیشن کی تعداد 177 ہوجائیگی۔

موضوعات:ایم کیو ایم