اسلام آباد(این این آئی) وزیراعظم عمران خان اور امریکی صدر ڈونلڈ ٹرمپ کے درمیان ٹیلیفونک رابطہ ہوا ہے جس میں دوطرفہ تعلقات اور خطے کے امور پر بات چیت کی گئی۔ترجمان وزیر اعظم آفس کے مطابق وزیراعظم عمران خان اور امریکی صدر ڈونلڈ ٹرمپ کے درمیان رابطہ ہوا ہے،

ٹیلی فونک رابطے میں دونوں رہنماؤں کے درمیان دو طرفہ تعلقات سمیت خطے کے امور پر بات چیت ہوئی۔اس موقع پر وزیراعظم عمران خان نے کہا کہ افغانستان میں مغوی پروفیسرز کی بازیابی انتہائی مثبت ہے، مغربی یرغمالیوں کی افغانستان میں رہائی مثبت پیشرفت ہے، پاکستانیوں کو اس پر خوشی ہے کہ وہ محفوظ اور آزاد ہیں۔ امریکی صدر ڈونلڈ ٹرمپ نے کہا کہ مثبت عمل میں پاکستان کی سہولت کاری کے لیے شکر گزار ہیں۔ وزیراعظم نے پر امن اور مستحکم افغانستان کے لئے افغانستان میں امن و مصالحتی عمل میں پاکستان کے عزم کا اعادہ کیا۔ دونوں رہنماؤں نے اس مشترکہ ہدف کے حصول کے لئے کام جاری رکھنے پر اتفاق کیا۔ وزیراعظم نے صدر ڈونلڈ ٹرمپ کو مقبوضہ جموں و کشمیر کی صورتحال کے بارے میں بھی آگاہ کیا۔ وزیراعظم نے کہا کہ 80 لاکھ سے زائد کشمیری شہریوں کے محاصرے کو 100 روز سے بھی زیادہ گزر گئے ہیں۔ وزیراعظم نے صدر ڈونلڈ ٹرمپ کی اس حوالے سے سرگرمیوں اور مصالحتی پیشکش کی تعریف کی اور اس بات کی ضرورت پر زور دیا کہ صدر ڈونلڈ ٹرمپ کو جموں و کشمیر کے دیرینہ تنازعہ کے حل کے لئے اپنی کوششیں جاری رکھنی چاہئیں۔ نیویارک اور واشنگٹن میں گزشتہ ملاقاتوں کو یاد کرتے ہوئے دونوں رہنماؤں نے دوطرفہ تعاون اور کثیر الجہتی شعبوں میں تعلقات کو مزید فروغ دینے پر اتفاق کیا۔ دونوں رہنماؤں نے باہمی قریبی رابطہ کرنے پر بھی اتفاق کیا۔

موضوعات:عمران خان اورڈونلڈ ٹرمپ کے درمیان ٹیلیفونک