اسلام آباد (این این آئی)وزیر اطلاعات چوہدری فواد حسین نے کہا ہے کہ عوام کا مال لوٹ کر رات کو مرغی اور دن کو انڈے کھانے والے تحریک انصاف کے اصلاحات کے ایجنڈے سے سخت تکلیف میں ہیں ٗشاہ جی اور ان کے لیڈر نے پاکستان کے خزانے کو سونے کی مرغی سمجھ کر حلال کیا ٗپیپلزپارٹی آخرکتنا عرصہ بھٹو صاحب کے پیچھے اپنی کرپشن اور جرائم کو چھپاتی رہے گی؟

پیپلز پارٹی کے رہنما خورشید شاہ کے بیان پر ردعمل کا اظہار کرتے ہوئے وزیر اطلاعات و نشریات چوہدری فواد حسین نے کہا کہ عوام کا مال لوٹ کر رات کو مرغی اور دن کو انڈے کھانے والے پاکستان تحریک انصاف کے اصلاحات کے ایجنڈے سے سخت تکلیف میں ہیں۔انہوں نے کہاکہ شاہ جی اور ان کے لیڈر نے پاکستان کے خزانے کو سونے کی مرغی سمجھ کر حلال کیا۔انہوں نے کہاکہ پیپلزپارٹی آخرکتنا عرصہ بھٹو صاحب کے پیچھے اپنی کرپشن اور جرائم کو چھپاتی رہے گی؟۔انہوں نے کہاکہ بھٹو صاحب نے ملک کو جوہری قوت بنانے کی بنیاد رکھی، شاہ جی اور ان کے لیڈروں نے صرف کرپشن کو پروان چڑھایا۔انہوں نے کہاکہ نسٹ کو نٹس کہنے والے شاہ صاحب کو نہیں پتا کہ ایگرو اکانومی کے جدید رجحانات کیا ہیں۔؟انہوں نے کہاکہ’’ آؤ مل کر بیٹھتے ہیں ‘‘شاہ صاحب کا یہ جملہ این آر او کی دعوت ہے۔انہیں پیار سے عرض کرتا ہوں’’We are sorry‘‘۔ وزیر اطلاعات نے کہاکہ عمران خان روایتی وزیراعظم نہیں جو حکمران بن کر عوام کو اپنا غلام سمجھے۔انہوں نے کہاکہ پاکستان کے عوام نے عمران خان کو وزیراعظم منتخب کرکے لٹیروں کے خلاف اعلان جنگ کیا ہے۔انہوں نے کہاکہ ملک کے عوام کا مال لوٹنے والوں کے مقدر میں اب مر غی ہے نہ انڈہ، صرف جیل کی دال ہے۔

موضوعات:خورشید شاہ فواد چوہدری