لاہور (مانیٹرنگ ڈیسک) سینئر صحافی و تجزیہ کار چودھری غلام حسین نے ایک نجی ٹی وی چینل کے پروگرام میں گفتگو کرتے ہوئے کہا کہ احد چیمہ کیا گرفتار ہوئے ہیں ان کو نیب سے زندہ یا مردہ باہر لانے کے لیے زمین اور آسمان ایک کر دیا گیا ہے۔ انہوں نے کہا کہ مسلم لیگ (ن)

کے لیے احد چیمہ وہ طوطا ہے جس میں ساری ن لیگ کی جان ہے، سینئر صحافی غلام حسین نے کہا کہ یہ لوگ یونین کونسل کی سطح پر جلوس اور دھرنے کی شکل میں بندے اکٹھے کر رہے تھے، اس کے بعد انہوں نے افضل نامی ایم این اے کے ذمہ لگایا کہ آپ نے نیب کے ہیڈ کوارٹر پر حملہ کرنا ہے جب یہ تشویشناک خبریں پھیلیں تو نیب نے وزارتِ داخلہ سے گزارش کی کہ ہمیں رینجرز، ایف سی یا فوج دی جائے، سیکرٹری داخلہ ارشد مرزا نے سمری منظور کر لی اور وزیر داخلہ احسن اقبال کو منظوری کے لیے بھیجی کہ نیب ایک اہم ادارہ ہے اسے رینجرز دی جائے تاکہ کوئی مسئلہ نہ پیدا ہو، وزیر داخلہ احسن اقبال نے اس پر ایک نوٹ لکھ دیا کہ ہم نیب کو رینجرز نہیں دیں گے۔ سینئر صحافی چودھری غلام حسین نے کہا کہ نیب اس ملک اور ریاست کا ادارہ ہے، اس نے خود اپروچ کی، انہوں نے کہا کہ ہماری اطلاعات اور باخبر ذرائع یہ کہتے ہیں کہ نیب کے ہیڈ کوارٹر پر رینجرز کے دستے پہنچ چکے ہیں، سینئر صحافی غلام حسین نے کہا کہ غالباً کور کمانڈر لاہور لیفٹیننٹ جنرل عامر ریاض کی منظوری سے یہ دستے وہاں تعینات کیے گئے ہیں۔

موضوعات:چودھری غلام حسین