اسلام آباد(مانیٹرنگ ڈیسک) زینب کے قاتل عمران کا کوئی بینک اکائونٹ موجود نہیں، نجی ٹی وی کے اینکر کا دعویٰ جھوٹا نکلا، زینب کے قاتل عمران کا کوئی بینک اکائونٹ کسی کمرشل بینک میں موجود نہیں، سٹیٹ بینک نے رپورٹ پنجاب حکومت کو دیدی۔ تفصیلات کے مطابق سینئر صحافی و تجزیہ کار ڈاکٹر شاہد مسعود کی جانب سے زینب کے قاتل عمران کے بینک اکائونٹس کے

انکشافات کے بعد سٹیٹ بینک نے اپنی رپورٹ میں ان کے دعوے کو غلط قرار دیتے ہوئے کہا کہ زینب کے قاتل عمران کا کوئی بینک اکائونٹ ملک کے کسی کمرشل بینک میں موجود نہیں جبکہ بینک اکائونٹس کی جعلی فہرست سامنے لا کر عوام کو گمراہ کرنے کی سازش کی گئی ہے۔ سٹیٹ بینک نے اپنی رپورٹ پنجاب حکومت کے حوالے کر دی ہے جس کا اعلان آج کئے جانے کا امکان ہے۔ اس حوالے سے صوبائی وزیر قانون پنجاب رانا ثنا اللہ کی سربراہی میں پنجاب حکومت کی کابینہ کی ذیلی کمیٹی کا اہم اجلاس منعقد ہوا جس میں ایڈیشنل چیف سیکرٹری ، سپیشل برانچ اور دیگر اداروں کے افسران نے شرکت کی۔ ذرائع کے مطابق اجلاس میں سٹیٹ بینک آف پاکستان کی جانب سے دی جانیوالی رپورٹ میں قاتل عمران کے کسی بھی بینک اکائونٹ نہ ہونے کی بات سامنے آئی ہے۔ڈاکٹر شاہد مسعود کے ایک روز قبل کئے گئے انکشافات غلط ثابت ہونے پر پنجاب حکومت آج شام اس حوالے سے پریس کانفرنس کا انعقاد کر رہی ہے جس میں تمام تر تفصیلات میڈیا کو دی جائیں گی۔واضح رہے کہ معروف اینکر حامد میر بھی اس معاملے پر ڈاکٹر شاہد مسعود کے دعوے کو غلط قرار دے چکے ہیں جبکہ صحافتی حلقوں کی جانب سے ڈاکٹر شاہد مسعود کے دعوے کو من گھڑت اور بے بنیاد قرار دیا جا رہا ہے۔ دوسری جانب زینب قتل کیس میں چیف جسٹس کے از خود نوٹس کی سماعت کی تاریخ تبدیل کر دی گئی۔

خیال رہے کہ چیف جسٹس آف پاکستان ثاقب نثار نے زینب قتل کیس پر از خود نوٹس لیا تھا جس کی مزید سماعت پیر تک ملتوی کر دی گئی تھی تاہم اب سماعت پیر کی بجائے اتوار کو ہو گی۔ چیف جسٹس سپریم کورٹ لاہور رجسٹری میں از خود نوٹس کی سماعت کریں گے ۔ آئی جی پنجاب اور ڈاکٹر شاہد مسعود کو تمام ریکارڈ سمیت عدالت کے سامنے پیش ہونے کا حکم دے دیا۔

ترجمان پنجاب حکومت ملک احمد خان نے بھی اس معاملے پر بات کرتے ہوئے کہا ہے کہ کہا کہ ڈاکٹر شاہد مسعود جے آئی ٹی کے سامنے پیش نہیں ہوئے۔ ان کانمبر بھی بند ہے اور ان سے رابطہ بھی نہیں ہو پا رہا۔

موضوعات:اسٹیٹ بینک ترجمان پنجاب حکومت چیف جسٹس سوموٹو ایکشن ڈاکٹر شاہد مسعود انکشافات