اسلام آباد (مانیٹرنگ ڈیسک) ایم کیو ایم کے رہنما ندیم نصرت واشنگٹن میں فری کراچی کی مہم چلا رہے ہیں، تفصیلات کے مطابق ندیم نصرت نے جو کہ ایم کیو ایم کے سابق کنونیئر ہیں امریکہ کے دارالحکومت میں پاکستان مخالف مہم فری کراچی کی قیادت سنبھال لی ہے، پہلے مرحلے میں واشنگٹن میں ٹیکسیوں پر فری کراچی کے اشتہاری بورڈز لگوائے گئے اور دوسرے مرحلے میں امریکی اخبار واشنگٹن ٹائمز میں فری کراچی کے عنوان

سے چار صفحوں پرمشتمل سپلیمنٹ دیا گیا۔ ایک موقر قومی اخبار کی رپورٹ کے مطابق ایم کیو ایم لندن کی طرف سے کچھ عرصہ پہلے کہا گیا تھا کہ ندیم نصرت کو بیماری کی وجہ سے ایم کیو ایم لندن کے کنونیئر کے عہدے سے ہٹا دیا گیا ہے۔ اس کے بعد ندیم نصرت امریکہ شفٹ ہو گئے اور گزشتہ کچھ ماہ سے بالکل خاموش تھے، ان کے بارے میں کچھ پتہ نہیں تھا کہ وہ کیا کر رہے ہیں، ان کے بارے میں تو اس وقت پتہ چلا جب واشنگٹن ڈی سی میں فری کراچی کے نام سے ٹیکسی اشتہارات کی مہم شروع کی گئی اور تنظیم کی جانب سے اعلان کیا گیا کہ اس مہم کی قیادت ایم کیو ایم کے سابق کنونیئر ندیم نصرت کریں گے۔ جب امریکی ریاست نیوجرسی میں مقیم ندیم نصرت سے اس حوالے سے رابطہ کیا گیا تو انہوں نے تصدیق کرتے ہوئے بتایا کہ کراچی میں پروفیسر حسن ظفر کی ہلاکت کے واقعہ کے بعد انہوں نے اس مہم کی قیادت کا سنبھالنے کا فیصلہ کیا۔ ندیم نصرت نے کہا کہ فری کراچی مہم کا مقصد کراچی کو پاکستان سے الگ کروانا نہیں ہے بلکہ کراچی کو مبینہ ریاستی جبر و ظلم سے نجات دلانا ہے۔ ندیم نصرت نے اس موقع پر کہا کہ کراچی اور پاکستان سے باہر جو بھی واقعات پیش آ رہے ہیں وہ ردعمل ہے، انہوں نے کہا کہ اگر ریاست اس ردعمل کو ختم کرنا چاہتی ہے تو ملک میں انصاف قائم کرے اور سب کو یکساں حقوق دیے جائیں اور ایسا کرنے سے سب لوگ بلوچوں کے سمیت واپس قومی دھارے میں شامل ہو جائیں گے۔

جب سے الطاف حسین پاکستان سے گئے ہیں اس وقت سے ندیم نصرت بھی ملک سے باہر ہی ہیں اور وہ امریکی اور برطانوی شہریت رکھتے ہیں۔ ندیم نصرت نے بتایا کہ وہ ایک کتاب بھی لکھ رہے ہیں جو چند ماہ تک شائع ہو جائے گی۔ امریکہ میں رہنے والے پاکستانیوں نے واشنگٹن ڈی سی میں ٹیکسیوں پر فری کراچی کے بورڈز اور واشنگٹن ٹائمز میں خصوصی ضمیمے کی اشاعت کو ایم کیو ایم لندن کی پاکستان دشمنی اور پاکستان مخالف قوتوں کے ہاتھوں استعمال ہونے کی سازش قرار دیا ہے۔ اس موقع پر پاکستانی کمیونٹی نے کہا کہ ہم اس مہم کا منہ توڑ جواب دیں گے۔

موضوعات:ایم کیو ایم کے رہنما ندیم نصرت