اسلام آباد (مانیٹرنگ ڈیسک) پاکستان آرمی کو ایرانی ’’بسیج فورس‘‘ کے طرز پر فورس بنانے کی تجویز، تفصیلات کے مطابق ایرانی پاسداران انقلاب کے سربراہ میجر محمد علی جعفری نے پاک فوج کو ایرانی ’’بسیج فورس‘‘ کی طرز پر ایک فورس کے قیام کی تجویز دی ہے اور یہ فورس پاک آرمی کے شانہ بشانہ دہشت گردوں سے لڑے۔

معروف عربی اخبار الشرف الاوسط نے دعویٰ کرتے ہوئے کہا ہے کہ پاکستان آرمی چیف جنرل قمر جاوید باجوہ کے حالیہ دورہ ایران کے دوران یہ تجویز ’’ایرانی پاسداران انقلاب‘‘ کے سربراہ نے تہران میں ملاقات کے موقع پر دی۔ جنرل محمد علی جعفری نے کہا کہ سکیورٹی خطرات سے نمٹنے کے لئے پاکستان میں ’’بسیج‘‘ جس کا مکمل نام ’’سازمان بسیج مستضعفین‘‘ ہے کی طرز پر ایک عوامی فورس بنائی جائے جو پاک فوج کے ساتھ مل کر دہشت گردوں سے نبرد آزما ہو سکیں۔ انہوں نے گفتگو کے دوران کہا کہ یہ اقدام شام اور عراق میں کامیاب رہا ہے اس دوران انہوں نے امریکہ پر الزام لگاتے ہوئے کہا کہ وہ پاکستان کے استحکام کو خراب کرنے کی کوشش کر رہا ہے۔ انہوں نے کہا کہ ان کا ملک گزشتہ چار دہائیوں سے دشمنانہ خطرات سے نمٹنے کے لیے پاکستان کو اپنے دفاعی اور عوامی فورسز کے تجربات منتقل کرنے کو تیار ہے۔ دوسری جانب اخبار کا یہ دعویٰ بھی ہے کہ ایرانی پاسداران انقلاب کی سرکاری نیوز ایجنسی ’’سپاہ‘‘ کے مطابق زمینی افواج کے کمانڈر جنرل محمد پاکپور نے آرمی چیف قمر جاوید باجوہ کو آگاہ کیا کہ مستقبل میں شام اور عراق میں مسلسل شکست کے بعد داعش کے جنگجو بڑی تعداد میں پاکستانی سرحدی علاقوں میں پناہ لے سکتے ہیں جس کے لیے پہلے سے پیش قدمی کر لینا ضروری ہے۔

موضوعات:بسیج فورس