اسلام آباد (آئی این پی ) وزیراعظم کے ترجمان مصدق ملک نے کہا ہے کہ تمام قومی ادارے جے آئی ٹی کے ساتھ تعاون کر رہے ہیں، پاکستان مسلم لیگ (ن) کی قیادت نے کسی بھی قومی ادارے پر ذاتی مفاد کیلئے دباؤ نہیں ڈالا۔ وہ ایک نجی ٹیلی ویژن چینل سے گفتگو کر رہے تھے۔ انہوں نے کہا کہ پاکستان مسلم لیگ (ن) کی قیادت نے جے آئی ٹی کے دو ارکان پر اپنے تحفظات کا اظہار کیا ہے

اور کہا کہ جے آئی ٹی کے ان دو ارکان نے طارق شفیح کو اپنا بیان تبدیل کرنے پر دباؤ ڈالا۔ مصدق ملک نے کہا کہ ہم اس شخص کا نام نہیں جانتے کہ جو حسین نواز کی تصویر لیکس میں ملوث ہے۔ ایک سوال کے جواب میں انہوں نے کہا کہ ملک کے عوام جمہوریت کی اہمیت سے بخوبی آگاہ ہیں۔دریں اثناء وزیر اعظم کے معاون خصوصی ڈاکٹر آصف کرمانی نے کہا ہے کہ مختلف سیاسی جماعتوں کی خاک چھاننے والوں کو اب بنی گالہ دھوبی گھاٹ پر دھویا جائے گا ،جتنا مرضی دھو لیں، یہ داغ گہرے اور مستقل ہیں صاف نہیں ہوں گے ۔ جمعہ کو اپنے بیان میں ڈاکٹر آصف کرمانی نے کہا کہ عمران خان کے خلاف غیر ملکی فنڈنگ اور منی لانڈرنگ کی تحقیقات کے لئے بھی جے آئی ٹی بنائی جائے ۔ غیر ملکی فنڈنگ کیس میں عمران خان ابھی تک الیکشن کمیشن کو اکاؤنٹ دینے میں ناکام ہیں ۔ انہوں نے کہا کہ مختلف سیاسی جماعتوں کے خاک چھاننے والوں کو اب بنی گالہ دھوبی گھاٹ پر دھویا جائے گا ۔ انہوں نے کہا کہ جتنا مرضی دھو لیں یہ داغ گہرے اور مستقل ہیں صاف نہیں ہوں گے ۔

موضوعات:پاناما لیکس وزیراعظم