نوشہرہ(آن لائن) جمعیت علماء اسلام  کے اجتماع میں ٹریفک پولیس اہلکار نے معمر شخص  پر لاتوں کی بارش کردی آئی جی خیبرپختونخوا نے نوٹس لیتے ہوئے 24 گھنٹے میں تحقیقات کا حکم دیدیا۔نوشہرہ میں ٹریفک پولیس اہلکار نے ادب واحترام کی ساری حدیں پار کردیں۔ اہلکار نے جے یو آئی کے اجتماع کے دوران ایک بزرگ شہری کو رکنے کا کہا لیکن نہ رکنے پراہلکار نے اسے زوردار لات ماردی جس سے بزرگ شخص زمین پر جا گرا لیکن اہلکار نے یہیں پر

بس نہ کیا بلکہ بزرگ کو ایک اور لات رسید کرکے تہذیب اورشرم کی تمام حدیں ہی پھلانگ ڈالیں۔وردی کے نشے میں چور ہاتھ میں اسلحہ تھامے اہلکار درندگی کی انتہا کرکے چلتا بنا اوراس بدمعاشی کو لوگ دیکھتے ہی رہ گئے جب کہ بزرگ کی خاموشی اوربے چارگی سوائے تماشا بننے کے کچھ نہ کرسکی۔دوسری جانب  آئی جی خیبرپختونخوا  صلاح الدین محسود نے  واقعے کا نوٹس لیتے ہوئے اہلکار کے خلاف 24 گھنٹے میں انکوائری کرانے کا حکم دے دیا ہے۔

موضوعات:پولیس اہلکار