سکھر(آئی این پی)قومی اسمبلی میں قائد حزب اختلاف سید خورشید شاہ نے کہا ہے کہ بلاول بھٹو زرداری قومی اسمبلی میں اپوزیشن لیڈر ہوں گے، میں بلاول کے ایڈوائزر کے طور پر کام کروں گا ، ہماری کوشش ہے کہ سسٹم عوام کے ہاتھ میں رہے کسی اور کے ہاتھ میں نہ جائے ، 4مطالبات پارٹی کے نہیں عوام کے ہیں ، وزیرداخلہ نے اپنے ہی وزیراعظم پر عدم اعتماد کا اظہار کیا ہے ۔ بدھ کو سکھر میں میڈیا سے گفتگو کرتے ہوئے خورشید شاہ نے کہا کہ نوازشریف پر ایک مرتبہ نہیں کئی مرتبہ حملے ہوئے ، وزیرداخلہ نے اپنے ہی وزیراعظم پر عدم اعتماد کا اظہار کیا ہے ۔

انہوں نے کہا کہ 2008کے انتخابات میں ایسا تاثر دیا گیا کہ جیسے ملک تباہی کے دہانے پر ہے ، چار مطالبات پارٹی کے نہیں عوام کے ہیں ، ہماری کوشش ہے کہ سسٹم عوام کے ہاتھ میں رہے کسی اور کے ہاتھ میں نہ جائے ۔ اپوزیشن لیڈر نے کہا کہ بلاول قومی اسمبلی میں اپوزیشن لیڈر ہوں گے اور میں انکے ایڈوائزر کے طور پر کام کروں گا اور وفاقی حکومت پر دباؤ بڑھائیں گے ۔ ایک صحافی نے سوال کیا کہ نوازشریف چوہدری نثار سے ڈرتے ہیں تو خورشید شاہ نے کہا کہ میں آپ کی بات سے متفق ہوں ۔ ایک اور سوال کے جواب میں انہوں نے کہا کہ چیئرمین نیب کی تقرری پر وزیراعظم اور اپوزیشن لیڈر سے مشاورت کرتے ہیں ، جنوری میں پنجاب میں جلسے اور عوامی رابطہ مہم شروع کریں گے۔

موضوعات:اپوزیشن لیڈر بلاول بھٹو زرداری پیپلزپارٹی