لندن(سپورٹس ڈیسک) انگلش آل راؤنڈر معین علی نے کہا ہے کہ 2015کی ایشز سیریز میں ایک کینگرو کرکٹر نے انھیں اسامہ کہہ کر پکارا،انگلش اسپننگ آل راؤنڈر معین علی نے اپنی آٹوبائیوگرافی میں انکشاف کیا ہے کہ 2015کی ایشز سیریز کے کارڈف میں کھیلے گئے میچ میں ایک آسٹریلوی کھلاڑی نے انھیں اسامہ کہہ کر پکارا تھا۔اس مقابلے میں معین نے پہلی اننگز میں 77رنز بنانے کے ساتھ

پانچ وکٹیں بھی لی تھیں۔ وہ کہتے ہیں کہ ذاتی طور پر یہ میچ میرے لیے پرفارمنس کے لحاظ تو کافی اچھا رہا مگر اس دوران فیلڈ میں ایک آسٹریلوی کھلاڑی نے مجھے اسامہ کہہ کر بلایا جس پر مجھے شدید غصہ آیا، مجھے یقین نہیں آیا کہ کوئی مجھے اس طرح بھی کہہ کر بلاسکتا ہے ،میں کبھی بھی کرکٹ فیلڈ میں اتنے غصے میں نہیں آیا جتنا شدید غصہ مجھے تب آیا تھا۔معین علی کہتے ہیں کہ انھوں نے اس واقعے کے بارے میں کوچ ٹریوربیلس کو بھی آگاہ کیا تھا جوکہ خود ایک آسٹریلوی ہیں اور انھوں نے اس وقت کے کینگرو کوچ ڈیرن لی مین کے سامنے بھی یہ واقعہ اٹھایا، جس پر مذکورہ پلیئر سے جواب طلبی کی گئی مگر اس نے صاف انکار کردیا بلکہ اس کا کہنا تھا کہ اس نے فقط پارٹ ٹائمر کہہ کر بلایا ہے۔ معین علی کہتے ہیں کہ دونوں الفاظ میں زمین آسمان کا فرق اور انھیں اسے سننے میں کوئی غلطی نہیں ہوئی تھی۔ادھر کرکٹ آسٹریلیا نے معین علی کے انکشاف کے بعد اپنے بیان میں کہا ہے کہ وہ معاملے کی تحقیقات کریں گے ۔ کرکٹ میچ کے دوران ایسے ریمارکس اور رویہ ناقابل قبول ہے۔

موضوعات:معین علی