لاہور(آئی این پی) پاکستان سپر لیگ(پی ایس ایل) کے غیرملکی کمنٹیٹر میچ سے پہلے لاہور شہر گھومنے نکل آئے۔ کمنٹیٹر ایلن ولکنز، ڈیرن گنگا اور سابق ٹیسٹ کرکٹر ماجد خان اندرون شہر پہنچ گئے اور انہوں نے مسجد وزیر خان، شاہی حمام اور اندرون شہر کا دورہ کیا۔غیر ملکی کمنٹیٹر تاریخی عمارتیں دیکھ کر حیرت زدہ رہ گئے اور لاہور شہر کی خوبصورتی دیکھ کر خوب تعریفیں بھی کیں۔

یاد رہے کہ کمنٹیٹر ایلن ولکنز اور ڈیرن گنگا کل ہی پاکستان پہنچے ہیں اور وہ پی ایس ایل کے لاہور میں کھیلے جانے والے 2 پلے آف میچز اور کراچی کے نیشنل اسٹیڈیم میں کھیلے جانے والے فائنل میچ میں کمنٹری کے فرائض انجام دیں گے۔پی ایس ایل تھری کے پلے آف مرحلے کیلئے لاہور آنے والے غیرملکی آفیشیلز اور کھلاڑی سکیورٹی انتظامات پرمطمئن ہیں ۔ غیر ملکی کھلاڑی اور ٹیم مینجمنٹ کے ارکان کا لاہور پہنچنے پر پرتپاک استقبال کیا گیا۔کوئٹہ گلیڈی ایٹرز کے مینٹور سابق عالمی بلے باز سر ویون رچرڈ اور پشاور زلمی کے کپتان ڈیر ن سیمی نے تو ایئرپورٹ پر شائقین کے لئے اپنے بیانات بھی ریکارڈ کروائے ۔دونوں کا کہنا تھا کہ انہیں پاکستان دوبارہ آکر بہت خوشی ہوئی ہے، پاکستانی شائقین کو بھی حق حاصل ہے کہ وہ انٹرنیشنل کرکٹرز کو اپنی ہوم گرائونڈ میں کھیلتا دیکھ سکیں اور ان کے ملک میں انٹرنیشنل کرکٹ بحال ہو ۔ویوون رچرڈ کا کہنا تھا کہ پاکستان کھیلوں کے لئے محفوظ ملک ہے اور اس کا ثبوت یہ ہے کہ میں اپنی فیملی کے ہمراہ پاکستان آیا ہوں ۔مجھے اس بار امید ہے کہ ہماری ٹیم گزشتہ سال کے مقابلے میں زیادہ بہتر پرفارمنس کا مظاہرہ کرے گی ۔ڈیرن سیمی کا کہنا تھا کہ پاکستان میں مجھے آکر بہت خوشی ہوتی ہے اور پاکستانیوں کی میزبانی اور محبت نے مجھے بہت متاثر کیا ہے ۔دنیا کے دیگر غیر ملکی کرکٹرز کو بھی پاکستان آکر میزبانی کا لطف اٹھانا چاہئے ۔

انہوں نے کہا کہ وہ کئی بار پاکستان آچکے ہیں اس لئے پاکستان میرے لئے اجنبی نہیں ہے ۔انہوں نے اس امید کا اظہار کیا کہ ان کی ٹیم پی ایس ایل کے فائنل میں پہنچے گی ۔ لاہور پہنچنے والے غیر ملکی کھلاڑیوں میں آسٹریلوی کرکٹر کرس گرین بھی شامل ہیں، جو کوئٹہ گلیڈی ایٹرز کی نمائندگی کررہے ہیں۔کرس گرین کا کہناہے کہ وہ پہلی بار پاکستان آنے پر بہت پرجوش ہیں۔کوئٹہ گلیڈی ایٹرز کے

رائلی روسو بھی لاہور پہنچ گئے ہیں، انہوں نے شائقین سے اپنے پیغام میں کہا ہے کہ لاہور پہنچنے پرانہیں بہت خوشی ہے۔

موضوعات:پی ایس ایل تھری غیر ملکی کھلاڑی قذافی سٹیڈیم لاہور آمد