اندرون (این این آئی)بھارتی ٹیم کے قائمقام کپتان اور مایہ ناز اوپننگ بیٹسمین روہت شرما ٹی ٹونٹی انٹرنیشنل کرکٹ میں دو سنچریاں بنانے والے بھارت کے پہلے اور دنیا کے پانچویں بلے باز بن گئے، انہوں نے سری لنکا کے خلاف دوسرے ٹی ٹونٹی میچ میں شاندار سنچری بنا کر یہ کارنامہ انجام دیا ٗشرما نے اس سے قبل 2015ء میں جنوبی افریقہ کے خلاف سنچری سکور کی تھی، اس سے قبل نیوزی لینڈ کے برینڈن میک کولم،

ویسٹ انڈیز کے کرس گیل، ویسٹ انڈیز کے ہی ایون لیوس اور نیوزی لینڈ کے کولن منرو کو ٹی ٹونٹی انٹرنیشنل کرکٹ کی تاریخ میں دو، دو سنچریاں بنانے کا اعزاز حاصل تھا۔ اس کے ساتھ ساتھ انہوں نے کرس گیل کے زیادہ رنز کا ریکارڈ بھی توڑ دیا، اسطرح شرما زیادہ ٹی ٹونٹی رنز بنانے والے دنیا کے 12ویں بلے باز بن گئے ہیں،

شرما نے 70 میچز میں دو سنچریوں اور 12 نصف سنچریوں کی مدد سے 1620 رنز بنا رکھے ہیں جبکہ کرس گیل نے 1577 رنز بنا رکھے تھے، اس کے علاوہ شرما ٹی ٹونٹی میں زیادہ چھکے لگانے والے مشترکہ طور پر نویں کھلاڑی بن گئے ہیں، انہوں نے افغانستان کے محمد شہزاد کے 66 چھکوں کا ریکارڈ برابر کیا ہے۔

موضوعات:روہت شرما