برمنگھم (این این آئی)بھارتی ٹیم کے کپتان اور سٹار بلے باز ویرات کوہلی نے کہا ہے کہ وہ پاکستان کے خلاف میچ سے ہمیشہ لطف اندوز ہوتا ہے، مستقبل میں بھی اس طرح کے مقابلوں سے عار محسوس نہیں کریں گے، پاک بھارت سیریز کی بحالی کے حوالے سے کوئی رائے نہیں رکھتا بورڈ جو فیصلہ کرے گا اسے قبول کریں گے۔ میڈیا رپورٹ کے مطابق بھارتی ٹیم کے کپتان نے کہاکہ پاکستان سے میچ کھیل کر ہمیشہ لطف اندوز ہوا ہوں اور مستقبل میں بھی اسطرح کے مقابلوں میں حصہ لینے میں عار محسوس نہیں کریں گے
لیکن دو طرفہ سیریز کی بحالی کے حوالے سے کوئی رائے نہیں رکھتا۔ دونوں ممالک کے درمیان دوطرفہ سیریز کے حوالے سے پوچھے گئے سوال کے جواب پر کوہلی نے کہا کہ میں ان فیصلوں کے بارے میں بات کرنے کا مجاز نہیں، بورڈ کا کام ہے، میری رائے سے فرق نہیں پڑتا اور پڑنا بھی نہیں چاہیے۔ انہوں نے کہا کہ بحیثیت کھلاڑی میرا کام صرف کرکٹ کھیلنا ہے اور میں ساری مخالف ٹیموں کے خلاف ایک ہی جذبے سے کھیلتا ہوں۔ ان کا کہنا ہے کہ پاکستان کے خلاف میچ میں یووراج سنگھ کی اننگز نے میچ کا نقشہ بدل کر رکھ دیا، یووراج سنگھ نے ضرورت کے مطابق بھرپور اننگز کھیلی اور یہی وجہ ہے کہ ہم میچ جیتنے میں کامیاب ہوئے۔

موضوعات:ویرات کوہلی