لندن (آئی این پی) پی ایس ایل اسپاٹ فکسنگ کیس میں معطل قومی کرکٹر ناصر جمشید نے مقدمے میں پاکستان کرکٹ بورڈ کو عدالت لے جانے کی دھمکی دے دی۔سماجی رابطے کی ویب سائٹ ٹوئیٹر پر جاری ویڈیو میں پاکستان کے سابق اوپنر ناصر جمشید نے دعویٰ کیا کہ پی سی بی ان کا نام بدنام کر رہا ہے۔ انہوں نے بورڈ کے اینٹی کرپشن یونٹ کو چیلنج کیا کہ وہ ان کے خلاف جو بھی ثبوت ہیں عدالت میں پیش کرے۔انہوں نے اپنی پوسٹ میں تحریر کیا کہ پی سی بی میری خاموشی کا فائدہ اٹھا رہا ہے۔

اب انہیں جواب دینے اور عدالت لے جانے کا وقت ہے۔ناصر جمشید نے کہا کہ پی سی بی میرے ساتھ زیادتی کر رہا ہے جہاں کھلاڑیوں کو بلا کر میرے خلاف بیان دینے کیلئے دباؤ ڈالا جا رہا ہے۔ میں چیلنج کرتا ہوں کہ میرے خلاف ثبوت عوام کے سامنے لائیں۔ پروفیشنلزم نام کی بھی کوئی چیز ہوتی ہے، اس سب سے میری ذاتی زندگی بہت متاثر ہو رہی ہے۔ میں نے اپنے وکیل سے مشاورت کی ہے اور ہم اسے چیلنج کرتے ہوئے پی سی بی کو عدالت لے کر جائیں گے۔

موضوعات:سکینڈل