لاہور (نیوز ڈیسک) مصباح الحق کی ون ڈے کرکٹ سے ریٹائرمنٹ کے بعد عوام کی نگاہیں نئے کپتان کی متلاشی ہیں لیکن ابھی تک تو اس کیلئے صلاح مشورہ ہی کیا جا رہا تھا تاہم اب کپتانی کی دوڑ میں شامل ممکنہ کھلاڑیوں کے نام سامنے آ گئے ہیں۔ ذرائع کے مطابق چیئرمین پی سی بی شہریار خان نے بورڈ کے اعلیٰ حکام اور ٹیسٹ کپتان مصباح الحق سے بھی نئے ون ڈے کپتان کیلئے صلاح مشورہ کیا ہے۔ ذرائع کے کہنا ہے کہ بورڈ حکام ابھی یہ فیصلہ کرنے سے قاصر ہیں کہ ٹیم کی قیادت کسی نوجوان کھلاڑی کو سونپی جائے یا سینئر کھلاڑی کو کپتان اور نوجوان کھلاڑی کو نائب کپتان بنا کر اسے مستقبل کیلئے تیار کیا جائے۔

مزید پڑھئے:شادیوں کے لحاظ سے راجستھان دوسرے نمبر پر

سینئر کھلاڑیوں میں محمد حفیظ اور سابق کپتان شعیب ملک ریس میں سب سے آگے ہیں جبکہ نوجوان کھلاڑیوں میں وکٹ کیپر سرفرازاحمد ،وہاب ریاض ،فواد عالم اور اظہرعلی کے نام زیرغور ہے۔ واضح رہے کہ میگاایونٹ میں ناقص کارکردگی کے باعث شہریار خان سلیکشن کمیٹی کی تبدیلی کا عندیہ بھی دے چکے ہیں اور نئے چیف سلیکٹر کیلئے سابق چیف سلیکٹر وسیم باری اور محسن خان کے نام زیرغور ہیں۔ واضح رہے کہ شعیب ملک کافی عرصے سے ٹیم سے باہر ہیں جبکہ ان کا ماضی بھی شفاف نہیں لیکن اس کے باوجود شعیب ملک کو نہ صرف ٹیم میں واپس لانے بلکہ انہیں ٹیم کا کپتان بنانے پر بھی غور کیاجا رہا ہے۔