صوابی(این این آئی)سابق اسپیکر قومی اسمبلی اسد قیصر کے حجرہ واقع موضع مرغز (صوابی)پر ایکسائز اینڈ ٹیکسیشن اور پولیس نے چھاپہ مار کر نان کسٹم پیڈ گاڑیاں برآمد کرلی جبکہ اسد قیصر نے عدالت سے ضمانت کے باوجود اپنے گھر پر چھاپے کو بنیادی انسانی حقوق اور پختون روایات کے منافی قرار دیا ۔

سوشل میڈیا پر وائرل ہونے والی اطلاعات کے مطابق اسد قیصر کے حجرے سے چھاپے کے دوران قیمتی امپورٹڈ گاڑیاں برآمد ہوئی ہیں۔تمام گاڑیوں کی مکمل تفصیلات چیک کرنے اور گاڑیوں کا معائنہ کرنے کے بعد پتہ چلا کہ گاڑیاں ایکسائز اینڈ ٹیکسیشن پاکستان کے پاس رجسٹرڈ ہی نہیں ہے۔تمام گاڑیاں غیر رجسٹرڈ اور نان کسٹم پیڈ ہے،نان کسٹم پیڈ گاڑیوں میں کروڑوں روپے مالیت کی ایک عدد لیکسس V8نمبر پلیٹ STM-16، ایک عدد ہونڈا Orielجس پر اسلام آباد نمبر AAS-118نمبر پلیٹ لگا تھا جبکہ ایک ویگو ڈالا جس پر سرکاری نمبر پلیٹ B-1820لگا ہوا تھا۔

گاڑیوں کو سرکاری تحویل میں لے کر سابقہ سپیکر قومی اسمبلی اسد قیصر، ان کے بھائیوں سابقہ ایم پی اے عاقب اللہ اور عدنان خان کے خلاف تفتیش کا آغاز کردیا گیا۔اس موقع پر اسد قیصر نے اپنی ٹویٹ میں کہا کہ پولیس کے ذریعے ان کے گھر پر چھاپہ مارا ،چھاپے کے دوران میرے گھر سے دو گاڑیاں زبردستی چھین لی گئی ،متعلقہ عدالتوں سے تمام جعلی ایف آئی آر میں ضمانت کے باوجود پائونڈری وال کے تقدس کی خلاف ورزی کی جارہی ہے ہماری جدوجہد اس وقت تک جاری رہے گی جب تک قانون کی حقیقی جمہوریت کی حکمرانی اور آئین کی بالادستی کی بحالی نہ ہو ۔

موضوعات:اسد قیصر