لاہور(مانیٹرنگ ڈیسک ، این این آئی) وزیراعلیٰ پنجاب چوہدری پرویز الٰہی نے کہا ہےکہ شہباز شریف کو اعتماد کا ووٹ لینے میں جان کے لالے پڑ جائیں گے۔لاہور میں تقریب سے خطاب میں چوہدری پرویز الٰہی نے کہا کہ حمزہ شہباز کو گورنر پنجاب نے خط لکھنا ہے، مجھے نہیں معلوم حمزہ شہباز وطن واپس آ گئے ہیں یا نہیں، آج رات عمران خان سے مل کر تین نام دیں گے۔

پھر تین نام حمزہ شہباز شریف نے دینے ہیں۔انہوں نے کہا کہ گورنر ان کا ہے اور ہمیں کہا گیا اعتماد کا ووٹ لیں، ہم نے اعتماد کا ووٹ لے کر انہیں سرپرائز دیا، اب انہیں پتا چلے گا جب صدر عارف علوی وزیراعظم کو اعتماد کا ووٹ لینے کا کہیں گے، انہیں اعتمادکے ووٹ کا کہیں گے تو انہیں جان کے لالے پڑجائیں گے۔صحافی نے پرویز الٰہی سے سوال کیا کہ آپ بلے کے نشان پر الیکشن لڑیں گے یا ٹریکٹر کے نشان پر؟ اس پر پرویز الٰہی نے کہا کہ اس سوال کے جواب کیلئے آپ کو تھوڑا صبر کرنا پڑے گا۔وزیراعلیٰ پنجاب کا کہنا تھا کہ ہم نے اعتماد کا ووٹ لے لیا ہے اب انہیں اعتماد کا ووٹ لینا پڑے گا اور شہباز شریف کو اعتماد کا ووٹ نہیں ملنا جب کہ نواز شریف نے بھی کہہ دیا ہے کہ الیکشن کروائیں۔علاوہ ازیں وزیراعلیٰ پنجاب چودھری پرویز الٰہی کی زیر صدارت پبلک پرائیویٹ پارٹنرشپ اینڈ مانیٹرنگ بورڈ کا12واںاجلاس منعقد ہوا۔وزیراعلیٰ پنجاب چودھری پرویزالٰہی نے ملتان وہاڑی دو رویہ سڑک کی تعمیر کے منصوبے کی منظوری دے دی۔

وزیراعلیٰ چودھری پرویزالٰہی نے کہا کہ پہلے مرحلے میں ملتان سے ٹبہ سلطان پو رتک دو رویہ39کلو میٹرطویل سڑک تعمیر کی جائے گی۔ملتان سے ٹبہ سلطان پور تک دو رویہ سڑک پبلک پرائیویٹ پارٹنر شپ کے تحت بنے گی۔ملتان سے ٹبہ سلطان تک دو رویہ سڑک کی تعمیر ایک سال میں مکمل ہوجائے گی۔ٹبہ سلطان پور سے وہاڑی تک47کلو میٹرطویل دو رویہ سڑک دوسرے مرحلے میں تعمیر کی جائے گی۔

ٹبہ سلطان پور سے وہاڑی تک دو رویہ سڑک ورکس اینڈ کمیونیکیشن ڈیپارٹمنٹ بنائے گا۔ اجلاس میں فیصل آباد چنیوٹ،سرگودھا دورویہ سڑک کی تعمیر کے منصوبے کی بھی منظوری دی گئی۔وزیراعلیٰ نے کہا کہ فیصل آباد چنیوٹ،سرگودھا دو رویہ سڑک پبلک پرائیویٹ پارٹنر شپ کے تحت دو مراحل میں مکمل کی جائے گی۔ پہلے مرحلے میں فیصل آباد سے چنیوٹ تک دو رویہ سڑک کا منصوبہ مکمل کیا جائے گا۔اجلاس میں نظر ثانی شدہ ماحولیاتی اور سماجی مینجمنٹ سسٹم کی بھی منظوری دی گئی۔اجلاس میں پبلک پرائیویٹ پارٹنر شپ اینڈ مانیٹرنگ بورڈ کے 11ویں اجلاس کے فیصلوں کی توثیق کی گئی۔

موضوعات:پرویز الٰہی