پرویز الٰہی کی دو بہوئوں اور بیٹے کو ریکارڈ سمیت طلب کرلیاگیا۔اثاثوں میں غیر معمولی اضافہ، کڑیاں منی لانڈرنگ کیس کی تفتیش سے ملنے لگیں

اسلام آباد (این این آئی)بینک اکائونٹس میں بھاری رقوم کی منتقلی اور اثاثوں میں اضافے کے سبب وزیر اعلی پنجاب کے خاندان کے افراد ایف آئی اے کے ریڈار پر آگئے۔تفصیلات کے مطابق ایف آئی اے نے وزیراعلی پنجاب چوہدری پرویز الٰہی کی دو بہووں اور بیٹے کو ریکارڈ سمیت طلب کرلیا۔راسخ الٰہی، ان کی اہلیہ زہرہ الٰہی اور مونس الٰہی کی اہلیہ تحریم الٰہی کو 2016سے 2021کے درمیان ہونیوالی مشکوک بینک ٹرانزیکشنز پر طلب کیا گیا ہے،تینوں افراد کے اکائونٹس سے بھاری رقوم پنجاب اسمبلی کے نائب قاصد قیصر اقبال بھٹی کے اکائونٹ میں منتقل ہوئیں۔راسخ الٰہی ایف آئی اے کے دفتر آئے جبکہ دونوں خواتین پیش نہ ہوئیں۔ ایف آئی اے حکام کے مطابق منی لانڈرنگ کیس کی تفتیش میں شامل افراد کے پیش نہ ہونے کی صورت میں ان کیخلاف یکطرفہ کارروائی بھی کی جاسکتی ہے۔

موضوعات:پرویز الٰہی