کراچی (مانیٹرنگ ڈیسک ، این این آئی)جب سے ٹی ٹوئنٹی ورلڈ کپ کے سکواڈ کا اعلان ہوا ہے تب سے ہی ٹوئٹر پر صارفین سمیت نامور سابق کرکٹرز بھی سکواڈ کی سلیکشن پر تنقید کر رہے ہیں۔بہت سے صارفین کا یہ بھی کہنا ہے کہ مڈل آرڈر میں کوئی بھی تجربہ کار بیٹر نہیں

اور اسی لیے ٹیم میں شعیب ملک یا سرفراز احمد کو جگہ دینی چاہیے تھی۔تاہم اب رمیز راجہ کو کال کرنے والے متعدد شائقین کرکٹ نے براہ راست وکٹ کیپر بیٹر سرفراز احمد کو سلیکٹ نہ کرنے پر تشویش کا اظہار کیا۔رمیز راجہ نے سوالات کے جواب میں کہا کھلاڑیوں کا انتخاب سلیکشن کمیٹی کرتی ہے اور میں ان معاملات سے دور رہتا ہوں، میرے خیال سے اب وقت ہے کہ نئے ٹیلنٹ کو آزمایا جائے اور انہیں مواقع فراہم کیے جائیں۔ایک مداح نے چیئرمین پی سی بی سے وکٹ کیپر بیٹر محمد حارث کو سرفراز پر ترجیح دینے سے متعلق بھی پوچھا جس پر رمیز راجہ نے کہا پاکستان کے لیے خدمات کے باعث سرفراز احمد کو ڈراپ کرنا مشکل ہے لیکن ہم مستقبل کی منصوبہ بندی کر رہے ہیں، میں جانتا ہوں کہ محمد حارث میں ٹیلنٹ ہے اور وہ پرفارم کریں گے۔سوشل میڈیا پر مداحوں کے سوالات کا جواب دیتے ہوئے رمیز راجہ نے مزید کہا کہ پی سی بی انٹرنیشنل پلیئرز کے ساتھ ڈومیسٹک پلیئرز کا بھی خیال رکھتا ہے۔رمیز راجا نے کہا کہ پاکستان کی فتوحات کی بڑی وجہ ہماری مضبوط اوپننگ جوڑی ہے۔انہوں نے کہا کہ ٹیم ایک پلان کے تحت چل رہی ہے، اس پلان سے مڈل آرڈر پر دباو آتا ہے تاہم ٹیم اسی پلان سے فتوحات حاصل کرتی آرہی ہے۔

موضوعات:رمیز راجہ