لاہور( این این آئی)انسپکٹر جنرل پولیس پنجاب رائو سردار علی خا ن نے کہاہے کہ صوبے کے 14اضلاع میں ضمنی انتخابات کے پر امن انعقاد کیلئے پولیس فورس پوری طرح الرٹ ہے اوراس اہم قومی ذمہ داری کے دوران پولیس ٹیمیں صوبائی الیکشن کمیشن کو مکمل سپورٹ

اور تعاون فراہم کریںگی۔ آئی جی پنجا ب نے کہاکہ صوبے کے 14اضلاع کے 20حلقوں میں ضمنی انتخابات کی سکیورٹی کیلئے52ہزار سے زائد اہلکار و افسران تعینات کئے گئے ہیں جو بھرپور محنت ، ایمانداری اور خلوص نیت کے ساتھ فرائض کی ادائیگی کو یقینی بنائیں گے۔ آئی جی پنجاب نے کہا کہ پنجاب بھر کے 3100 سے زائد پولنگ سٹیشنزپر سکیورٹی عملہ تعینات ہو چکا ہے جو انتخابی عمل مکمل ہونے تک ڈیوٹی پر مامور رہے گا۔رائو سردار علی خان نے تمام اضلاع میں پولیس فورس کی چھٹیاں منسوخ کرتے ہوئے ہائی الرٹ رہنے کا حکم جاری کیا ۔ انہوں نے کہاکہ ایمرجنسی صورتحال میں تعیناتی کے لیے دوسرے اضلاع سے بھی نفری کو فوری طورپر بلایا جا سکتا ہے۔ آئی جی پنجاب نے کہاکہ لاہور ، ملتان سمیت تمام حساس اضلاع میں سپروائزری افسران خود الیکشن سکیورٹی انتظامات کی نگرانی یقینی بنائیں اور نقص امن کی کسی کوشش کو کامیاب نہ ہونے دیا جائے ۔ رائو سردار علی خان نے ہدایت کی کہ جن اضلاع میں الیکشن نہیں ہو رہے وہاں پر بھی نفری کو ہائی الرٹ رکھا جائے جبکہ ضمنی انتخابات والے اضلاع میں سکیورٹی کے ساتھ ساتھ ٹریفک مینجمنٹ کے لیے مؤثر انتظامات یقینی بنائے جائیں تاکہ ووٹنگ کیلئے آنے والے شہریوں کو کسی مشکل یا پریشانی کا سامنا نہ کرنا پڑے۔ ان خیالات کا اظہار انہوں نے سنٹرل پولیس آفس میں ضمنی انتخابات کی سکیورٹی کیلئے قائم کنٹرول روم کے اچانک دورے کے دوران مجموعی انتظامات کا جائزہ لیتے ہوئے کیا۔

موضوعات:آئی جی پنجاب