اسلام آباد (این این آئی)اٹارنی جنرل خالد جاوید خان نے کہا ہے کہ اس ریفرنس کے بعد مستعفی ہونے کا ارادہ رکھتا تھا،موجودہ حالات میں استعفے کا مطلب میدان چھوڑنے کے مترادف تھا۔فل کورٹ ریفرنس سے خطاب کرتے ہوئے کہاہے کہ اس ریفرنس کے بعد مستعفی ہونے کا

ارادہ رکھتا تھا، موجودہ حالات میں استعفے کا مطلب میدان چھوڑنے کے مترادف تھا۔خالد جاوید خان نے کہا کہ جسٹس مقبول باقر کا عدالتی کیریئر شاندار رہا،پی سی او کے دوران جسٹس مقبول باقر کے کردار کا ذکر نہ کرنا ناانصافی ہوگی۔انہوں نے کہا کہ سال2007 میں آمر کو اندازہ ہی نہیں تھا کہ اسے سزا بھی بھگتنا پڑے گی، آج کل سیاسی مخالفین کے خلاف آرٹیکل 6 آسانی سے استعمال کیا جارہا ہے۔انہوںنے کہاکہ آرٹیکل 6 سمجھنے کیلئے2007 کے واقعہ کو ذہن نشین کرنا ہوگا، آئین کے آرٹیکلز کا مقصد کسی کی ملک سے وفاداری جانچنا نہیں ہے۔اٹارنی جنرل نے کہا کہ جسٹس مقبول باقر کو 2007 کے واقعے کی قیمت بھی ادا کرنی پڑی تھی، سال 2013 کا دہشتگردی کا حملہ بھی ان کی ہمت متزلزل نہ کرسکا۔اٹارنی جنرل خالد جاوید خان کا کہنا تھا کہ جسٹس مقبول باقر نے دیگر ججز سے مل کر جسٹس فائز عیسیٰ کیخلاف ریفرنس کالعدم قرار دیا۔خیال رہے کہ سپریم کورٹ میں جسٹس مقبول باقر کے اعزاز میں فل کورٹ ریفرنس کا انعقاد کیا جس میں اٹارنی جنرل، سینئر وکلا اور بار نمائندگان شریک ہوئے۔

موضوعات:اٹارنی جنرل