اسلام آباد(مانیٹرنگ ڈیسک، این این آئی) وزیراعظم عمران خان نے سانحہ مری کی تحقیقات کا حکم دے دیا۔ٹوئٹر پر جاری بیان میں وزیراعظم عمران خان نے سانحہ مری پر افسوس کا اظہار کرتے ہوئے کہا کہ مری میں سیاحوں کی اموات پرافسردہ ہوں اور اس واقعے کی تحقیقات کا

حکم دیدیا ہے۔وزیراعظم نے کہا کہ غیرمعمولی برفباری اور موسمی حالات معلوم کیے بغیر عوام نے مری کا رخ کیا، اس صورتحال کے لیے ضلعی انتظامیہ تیار نہیں تھی، ایسے واقعات کی روک تھام کے لیے سخت قواعدوضوابط قائم کیے جائیں گے۔دوسری جانب گلیات کلڈنہ روڈ پر برفانی طوفان میں پھنس کر مرنے والوں کی شناخت کرلی گئی ،اسلام آباد پولیس کے اے ایس آئی نوید اقبال ، اہلیہ ، چار بیٹے اور دوبیٹے بھی جاں بحق ہوئے ۔ تفصیلات کے مطابق گلیات کلڈنہ روڈ پر برفانی طوفان میں پھنس کر مرنے والوں کی شناخت کرلی گئی ،ایک ہی خاندان کے آٹھ جبکہ دوسرے خاندان کے پانچ افراد مرنے والوں میں شامل ہیں ،اسلام آباد پولیس کے اے ایس آئی نوید اقبال انکی اہلیہ چار بیٹیاں اور دوبیٹے بھی جاں سے گئے ،راولپنڈی کے ایم شہزاد انکی اہلیہ دوبیٹے اور ایک بیٹی جاں بحق ہونے والوں میں شامل ہیں ،گوجرانوالہ کا 31 سالہ اشفاق لاہور کے اشرف اور نامعلوم نوجوان بھی دم گھٹنے سے جاں بحق ہوئے ۔ ریسکیو 1122مری کے مطابق تین دوست سہیل خان،اسد شاہ،اور ایم بلال بھی جاں بحق افراد کی فہرست میں شامل ہیں ۔

موضوعات:عمران خان