لاہور (آن لائن)امیر جماعت اسلامی پنجاب وسطی محمد جاوید قصوری نے کہا ہے کہ کفایت شعاری کا درس دینے والے وزیر اعظم نے تین برسوں میں 47غیر ملکی دورے کیے، جن پر 20کروڑ روپے خرچ آیا۔ اس ثابت ہو گیا ہے کہ وزیر اعظم عمران خان کے کفایت شعاری اور سادگی کے دعوے محض ڈھونگ تھے۔فارن فنڈنگ کیس میں بھی تحریک انصاف نے

3بینک اکاؤنٹس اور 31کروڑ روپے چھپا کر قوم کی آنکھوں میں دھول جھونکی۔اب سیکروٹنی کمیٹی کا غیر ملکی فنڈنگ میں تحریک انصاف کے اکاؤنٹس چھپانے کا انکشاف تشویشناک ہے۔ ان خیالات کا اظہار انہوں نے گزشتہ روز مختلف عوامی وفود سے گفتگو کرتے ہوئے کیا۔ انہوں نے کہا کہ عوام کے سامنے تحریک انصاف کا اصل چہرہ عیاں ہوچکا ہے۔ پاکستان سمیت124ممالک میں سیاسی جماعتوں کی بیرونی فنڈنگ پر پابندی ہے۔ حکومت اپنا اعتبار کھو چکی ہے اب 22کروڑ عوام کو حکمرانوں کی کسی بات پر یقین نہیں رہا۔ موجودہ حکومت بھی ماضی کی حکومتوں کا تسلسل معلوم ہوتی ہے۔ پیپلزپارٹی، مسلم لیگ (ن) اور تحریک انصاف کرپشن اور سرکاری وسائل لوٹنے میں بالکل ایک جیسے ہیں۔ ان ے خیر کی توقع نہیں ہے۔ کوئی حکومتی ترجمان بتانا پسند کرے گا کہ اقتدار میں آکر وزیر اعظم کی آمدن میں اضافہ کیسے ہوگیا ہے؟۔ اب یہ بات کسی سے ڈھکی چھپی نہیں رہی کہ وزیر اعظم عمران خان جب سے اقتدار میں آئے ہیں وہ اے ٹی ایم مشینوں کے سہارے پر چل رہے ہیں۔ کبھی جہانگیر ترین اور کبھی ذوالفقار ذلفی جیسے لوگ ان کے مالی معاملات اور بنی گالہ کے اخراجات کو برداشت کر رہے ہوتے ہیں۔یہ ہماری بد نصیبی ہے کہ ایسے کرپٹ حکمران پاکستان پر مسلط ہیں کہ جن کو عوام کی کوئی فکر نہیں ہے۔مہنگائی غربت اور بے روزگاری سے قوم اس قدر پریشان ہو چکی ہے کہ

اب دو وقت کی بجائے ایک وقت کی روٹی بھی لوگوں کو ملنا مشکل ہو چکا ہے۔ محمد جاوید قصوری نے اس حوالے سے مزید کہا کہ کوئی ایک شعبہ بھی ایسا نہیں جس کی کارکردگی کو مثالی قرار دیا جاسکتا ہو۔ بھرتیاں سفارش پر کی جارہی ہیں۔ کرونا فنڈنگ میں کرپشن پر تحقیقات برائے نام ہورہی ہے۔ حکومت اس حوالے کے حقائق جلد قوم کے سامنے لائے۔ کرپشن کے خاتمے کا واویلا کرنے والے ہی بد عنوان اور کرپشن سے لوتھڑے ہوئے نکل رہے ہیں۔

موضوعات:محمد جاوید قصوری