اسلام آباد(مانیٹرنگ، آن لائن) وزیراعظم عمران خان نے گورنر ہاؤس کی دیواریں مسمار کرنے کا حکم دیا ہے، نجی ٹی وی کی رپورٹ کے مطابق وزیراعظم عمران خان نے گورنر ہاؤس لاہور کی دیواریں مسمار کرنے کا حکم دیا ہے، جب انہیں پنجاب کے عہدیداروں نے بتایا کہ دیواریں گرانے پر لاہور ہائی کورٹ نے حکم امتناعی دے رکھا ہے جس پر انہوں نے ہدایات جاری کیں کہ

حکم امتناعی کو ختم کرنے کے لئے تمام تر قانونی اقدامات کئے جائیں۔ وزیراعظم کے حکم پر وزیراعلیٰ سیکرٹریٹ نے ایکشن لے لیا ہے اور محکمہ قانون پنجاب کو اہم ہدایات جاری کر دی گئی ہیں۔ دوسری جانب وزیر اعظم عمران خان نے راوی اربن ڈویلپمنٹ اتھارٹی(آریوڈی اے) اور سنٹرل بزنس ڈسٹرکٹ(سی بی ڈی)، والٹن سے متعلق جائزہ اجلاس کی صدارت کی۔روڈا کے مختلف منصوبوں میں شمسی توانائی سے چلنے والا قابل تجدید بجلی پیدا کرنے والے پلانٹ کی تنصیب، خصوصی اقتصادی زونز (SEZs) اور خصوصی ٹیکنالوجی زونز (STZs) کا قیام، فیری آپریشنز کا آغاز، نالج پارک اور رکھ جھک فارمز کا قیام شامل ہیں۔ یہ تمام منصوبے اپنی مالی ضروریات کے حوالے سے خود مختار ہوں گے، تاکہ ان کی پائیداری کو یقینی بنایا جا سکے۔وزیراعظم کو آئی ایم جی دبئی تھیم پارک کے اشتراک سے پاکستان کا سب سے بڑا تھیم پارک بنانے کے منصوبے پر بھی بریفنگ دی گئی۔ راوی ریور فرنٹ پر 2000 کنال اراضی پر بنایا جانے والایہ منصوبہ آریوڈی سرمایہ کاروں کو راغب کرنے کے لیے آئندہ ماہ شروع ہونے والی دبئی ایکسپو 2020 میں نمائش کے لیے پیش کرے گا۔وزیراعظم نے ملک میں سمارٹ، خود کفیل، صاف ستھرے اور سبز مکانات اور کاروباری منصوبوں کے فروغ کے لیے آریوڈی اے اورسی بی ڈی کی اہمیت پر زور دیا۔وزیراعظم نے متعلقہ حکام کو ہدایت کی کہ وہ ایک فعال حکمت عملی اپناتے ہوئے مسائل کو حل کریں تاکہ پاکستان براہ راست غیر ملکی سرمایہ کاری ایف ڈی آئی کو راغب کرکے ان جدید اور پائیدار رئیل اسٹیٹ منصوبوں سے زیادہ سے زیادہ فوائد حاصل کر سکے۔

موضوعات:وزیراعظم عمران خان