اسلام آباد (این این آئی)سپریم کورٹ نے پنجاب حکومت سے سانحہ ساہیوال رپورٹ اور ایڈیشنل پراسیکوٹر جنرل عابد مجید مرزا سے تفصیلات طلب کرتے ہوئے قتل کے ملزم پولیس اہلکار حافظ محمد عثمان کی ضمانت

کے کیس میں جواب مانگ لیا ۔ بدھ کو جسٹس قاضی فائز عیسیٰ اور جسٹس یحییٰ آفریدی پر مشتمل دو رکنی بینچ نے سماعت کی۔ ایڈیشنل پراسیکیوٹر جنرل پنجاب سے عدالت نے استفسار کیاکہ سانحہ ساہیوال کا کیا بنا۔ جسٹس قاضی فائز عیسیٰ ین کہاکہ ساہیوال میں معصوم بچوں کو مار دیا گیا،صرف ایک فون کال پر بے گناہ لوگوں کو مار دیا گیا،سمجھ نہیں آتا پنجاب حکومت اور پولیس کیا کر رہی ہے۔ انہوںنے کہاکہ معصوم شہریوں کے قاتلوں سے کوئی پوچھنے والا نہیں،بتائیں سانحہ ساہیوال میں پنجاب حکومت نے کیا کیا۔ایڈیشنل پراسیکیوٹر جنرل پنجاب عابد مجید مرزا نے کہاکہ میرے خیال میں کیس ہائیکورٹ میں زیر التوا ہے۔ جسٹس قاضی فائز عیسیٰ نے کہاکہ سانحہ ساہیوال سے متعلق معلومات لیکر جواب جمع کرائیں،عدالت نے قتل کے ملزم پولیس اہلکار حافظ محمد عثمان کی ضمانت منظور کر لی ، پولیس اہلکار حافظ عثمان پر ایک شہری کو گولی مارنے کا الزام تھا ۔

موضوعات:،سپریم کورٹ