حیدرآباد(آن لائن) پاکستان پیپلزپارٹی کے صوبائی صدر نثار احمد کھوڑو نے کہا ہے کہ سینٹ کے چیئرمین کے انتخاب میں حکمراں جماعت میں پھوٹ پڑ چکی ہے، جی ڈی اے نے اپنے ہی اتحادی جماعت پی ٹی آئی والوں کے 7اراکین کے نام دیئے ہیں اور انہیں بتایا ہے کہ انہوں نے سینٹ کے انتخابات میں جی ڈی اے کے امیدوار کو

ووٹ نہیں دیئے ہیں۔ وہ حیدرآباد سائٹ ایریا میں میڈیا سے گفتگو کررہے تھے۔ ان اس موقع پر پیپلزپارٹی ضلع حیدرآباد کے صدر صغیر قریشی، سیکریٹری اطلاعات آفتاب خانزادہ اور دیگر بھی موجود تھے۔ انہوں نے کہاکہ 13مارچ کو میرپورخاص، 14کو بینظیر آباد، 15 کو سکھر اور 16مارچ کو لاڑکانہ ڈویژن کا اجلاس ہوگا جس میں اسلام آباد دھرنے کیلئے تیاریوں کا جائزہ لیا جائیگا اور وہاں مقامی تنظیموں کو بھی اس حوالے سے بھرپور شرکت کیلئے کہا جائیگا، انہوں نے کہاکہ 4اپریل کو ذوالفقار علی بھٹو کا یوم شہادت ہے جو راولپنڈی یا اسلام آباد میں منایا جائیگا۔انہوں نے کہاکہ سینٹ کے چیئرمین کے انتخابات میں پی ڈی ایم کے امیدوار یوسف رضا گیلانی بڑی اکثریت سے کامیاب ہوں گے، عمران خان نے اپنے جن اراکین کو پیسے لے کر ووٹ بیچنے کا طعنہ دیا پھر ان ہی سے خود کیلئے اعتماد کا ووٹ لیا۔ انہوں نے کہاکہ سینٹ میں گڑ بڑ اور ہنگامہ عمران خان نے کیا تھا اس لئے سب سے پہلے یہی قصوروار ہیں۔ 2008ء میں عمران خان نے الیکشن کا بائیکاٹ کیا، پہلے بھی کھوکھلے تھے او راب بھی کھوکھلے ہیں۔ سینٹ کے چیئرمین کے انتخاب میں حکمراں جماعت میں پھوٹ پڑ چکی ہے، جی ڈی اے نے اپنے ہی اتحادی جماعت پی ٹی آئی والوں کے 7اراکین کے نام دیئے ہیں اور انہیں بتایا ہے کہ انہوں نے سینٹ کے انتخابات

میں جی ڈی اے کے امیدوار کو ووٹ نہیں دیئے ہیں۔ ایک طرف حکومت کہتی ہے کہ سینٹ میں ہماری اکثریت ہے دوسری طرف یہ بھی کہتے ہیں کہ ہم جیتنے کیلئے ہر حربہ استعمال کریں گے، اس دھمکی آمیز رویئے کا الیکشن کمیشن کو نوٹس لینا چاہئے، انہوں نے کہاکہ اوپن بیلٹنگ کے حوالے سے حکومت نے پہلے آرڈنینس جاری کیا جبکہ

وہ خود آرڈنینس کو کالا قانون کہتے رہے ہیں۔ حکومت کو جب سینٹ کے انتخاب میں اپنی اکثریت نظر نہیں آئی تو یہ ریفرنس سپریم کورٹ کو بھیجا جس نے عدالت نے ردی کی ٹوکری میں پھینک دیا۔ انہوں نے کہاکہ 26 مارچ سے پی ڈی ایم کا لانگ مارچ کراچی سے شروع ہوکر اپنی منزل کی طرف جائیگا جس کیلئے ہم پورے سندھ میں تیاریاں کررہے ہیں۔

موضوعات:نثار احمد کھوڑو