اسلام آباد(آن لائن) پولیس اہلکاروں کے ہاتھوں شہید ہونیوالے نوجوان اسامہ ستی کے والد ندیم یونس ستی نے آئی جی اسلام آباد عامر ذوالفقار خان کے فوری مستعفی ہونے کا مطالبہ کرتے ہوئے کہا ہے کہ اسامہ ستی کا معاملہ حکومت،وزیراعظم اور چیف جسٹس سپریم کورٹ کے لیے ٹیسٹ کیس ہے،انسداد دہشتگردی کی دفعات لگنے پر

کیس کا فیصلہ تین مہینوں میں کیا جائے۔ایمبسیڈر ہوٹل آبپارہ میں پریس کانفرنس کرتے ہوئے مقتول کے والد ندیم یونس نے کہا کہ اسامہ کے لیے آواز اٹھانے پر میڈیا سول سوسائٹی اور تاجران سمیت سب کا مشکور ہوں ،مجھے انتہائی دکھ ہے کہ رات کے دو بجے ہمارے وطن کے محافظوں نے میرے معصوم بیٹے کو قتل کردیا۔انہوں نے کہاکہ گولیاں گاڑی کے آگے سے لگیں ہیں نہ کہ پیچھے سے لگیں اوراسامہ کو گاڑی سے باہر نکال کر قتل کیا گیا اوراسامہ کے پاؤں پر لگنے والی گولی سے بھی یہی لگتا ہے۔انہوں نے کہاکہ جمعے والے دن پریس کلب کے باہر احتجاج کریں گے۔ایک سوال کے جواب میں انہوں نے کہاکہ جس گن سے فائرنگ ہوئی وہ نہیں مل رہی ،مقدمہ درج ہونا کوئی بڑی بات نہیں اگر ایف آئی آر کمزور ہوگی تو لازمی بات ہے کہ ججز ملزمان کو چھوڑنے پر مجبور ہو جائیں گے ۔انہوں نے سوال اٹھایا کہ چار دن ہو گئے ہیں مگر پولیس والوں کو وہ گن نہیں مل رہی ہے جس سے اسامہ پر گولیاں فائر کی گئیں۔یہ پولیس کی غفلت نہیں جان بوجھ کر ایسا کیا گیا ہے،اگر پولیس والے تعاقب کررہے تھے تو سامنے سے گولیاں کس نے ماریں؟انہوں نے کہاکہ شیخ رشید نے مجھ سے وعدہ کیا تھا اسلام آباد ہائیکورٹ کے ججز تحقیقات کریں گے،اب تک شیخ رشید نے ہمارا مطالبہ تسلیم نہیں کیا،ہم ان کی انکوائری کو تسلیم نہیں کرتے۔انہوں نے چیف جسٹس سپریم کورٹ

سے شکوہ کرتے ہوئے کہا کہ وہ کراچی کے نالوں پر سوموٹو نوٹس لیتے ہیں مگر میرے بیٹے کا سوموٹو نہیں لیا گیا ،میری چیف جسٹس سے اپیل ہے کہ وہ اس کیس کی جلد از جلد تحقیقات کرائیں اور ہمیں انصاف فراہم کریں۔انہوں نے کہا کہ عمران خان نے نیا پاکستان قبرستان میں دفن کردیا،وزیر اعظم صاحب اگر ان قاتلوں کو سزا نہ ہوئی تو میں قاتلوں کو معاف کردوں گا لیکن روز محشر وزیراعظم اور چیف جسٹس کا گریبان پکڑوں گا۔

موضوعات:اسامہ ستی کے والد