اسلام آباد(مانیٹرنگ ڈیسک، این این آئی )سینئر صحافی طارق محمود کورونا وائر س کے باعث انتقال کرگئے۔نجی ٹی وی کے مطابق سینئر صحافی طارق محمود عالمی وبا کورونا وائرس میں مبتلا تھے اور کچھ عرصے سے وینٹی لیٹرپرتھے۔

طارق محمود کئی ملکی اخبارات اور نشریاتی اداروں سے وابستہ رہے ہیں۔دریں اثنا ء وزیر اطلاعات سینیٹر شبلی فراز نے سینئر صحافی طارق محمود ملک کے انتقال پر گہرے دکھ اور افسوس کا اظہار کیا ہے ۔ اپنے بیان میں انہوں نے کہاکہ طارق محمود ملک ایک نفیس انسان اور محنتی رپورٹر تھے، انکے اہل خانہ کے ساتھ دلی تعزیت کا اظہار کرتا ہوں۔ وزیر اطلاعات نے کہاکہ اللہ تعالیٰ مرحوم کو جوار رحمت میں جگہ عطا فرمائے اور لواحقین کو صبر جمیل دے۔دریں اثنا سیکرٹری جنرل پیپلز پارٹی نیرحسین بخاری نے سنیئر صحافی طارق محمود کے انتقال پردکھ اور افسوس کا اظہار کیا ہے ۔ اپنے بیان میں نیئر بخاری نے  کہاکہ مرحوم طارق ملک کے غم میں برابر کے شریک ہیں ،طارق محمود کہنہ مشق صحافی تھے ۔نیر بخاری نے طارق محمود مرحوم کے لواحقین سے اظہار تعزیت کیا ۔

موضوعات:طارق محمود