اسلام آباد (مانیٹرنگ ڈیسک)پاکستان کرکٹ ٹیم کے سابق آل رائونڈر کپتان شاہد خان آفریدی نے شمالی وزیرستان میں شہید ہونے والے لیفٹیننٹ ناصر خالد کو شاندار الفاظ میں خراج تحسین پیش کیا ۔ سماجی رابطے کی ویب سائٹ ٹویٹر پر انہوں نے اپنے پیغام میں لکھا کہ ’’درد کا نشتر ہے، جو خبر بن کر رگ و پے میں اتر جاتا ہے، جوان جسموں پر اوڑھی خاکی

وردیاں جب اپنے ہی لہو میں نہاتی ہیں تو پیچھے رہ جانے والوں کے آنسو کون گن سکتا ہے؟ اپنی زندگیوں کے زیروبم میں مبتلا ہم کبھی جان نہیں سکتے کچھ لوگ ہمارے امن کی کیسی قیمت چکاتے ہیں‘‘۔انہوں نے پیغام کے آخر میں ’’ہم شہدا کے مقروض ہیں کا ہیش ٹیگ بھی استعمال کیا ۔ واضح رہے کہ ۔ وزیرستان میں دہشت گردوں سے لڑتے ہوئے لیفٹیننٹ ناصر خالد شہید ہوگئے۔ پاک فوج کے جوان جب ملک پر کوئی بھی آنچ آتی ہے تو وہ اپنی جان دینے سے بھی دریغ نہیں کرتے، ایسا ہی کچھ لیفٹیننٹ ناصر خالد شہید نے کیا، وہ پاکستان کے امن و امان کے دشمنوں کے خلاف لڑتے ہوئے جام شہادت نوش کر گئے۔ وہ شمالی وزیرستان میں امن دشمنوں کی جانب سے کئے گئے دھماکے میں شہید ہو گئے۔ لیفٹیننٹ ناصر خالد آسٹریلیائی دفاعی فورس اکیڈمی کے گریجو ایٹ تھے، ان کے والد نے بھی شہادت کا رتبہ حاصل کیا۔ان کے والد پولیس کے محکمہ میں ذمہ داریاں ادا کرتے ہوئے شہید ہوئے۔ لیفٹیننٹ ناصر خالد اپنے والدین کی اکلوتی اولاد تھے۔ ان کے خاندان میں صرف ان کی والدہ تھیں۔ شہید لیفٹیننٹ کی اپنی والدہ کے ساتھ سوشل میڈیا پر تصاویر وائرل ہیں، جس پر صارفین ان کی والدہ کے لئے دعا کر رہے ہیں کہ اللہ تعالیٰ انہیں صبر دیں، پہلے ان کے شوہر ملک کی خاطر شہید ہوئے اور اب ان کا بیٹا اپنے پاک وطن کی خاطر شہادت کے رتبے پر فائز ہوا، یقیناً ان کی والدہ ایک عظیم خاتون ہیں۔

موضوعات:شاہد خان آفریدی