اسلام آباد(این این آئی)پاکستان مسلم لیگ (ن) کے صدر اور قائد حزب اختلاف شہبازشریف نے مہنگائی میں مزید اضافے کی شدید مذمت کرتے ہوئے کہاہے کہ ملک میں مزید مہنگائی بڑھنے کا مطلب معاشی پالیسیوں کی ناکامی کی دلیل ہے۔

ایک بیان میں انہوں نے کہاکہ مہنگائی کا سونامی پاکستان کی معیشت کھاگیا، غریب اور ان کے خواب دفن ہوکر رہ گئے ہیں،شہروں سے بھی زیادہ دیہی علاقوں کے عوام مہنگائی سے پس کر رہ گئے ہیں،ایک زرعی ملک کو تباہ کرنے کی پالیسی پر عمل ہورہا ہے۔ انہوں نے کہاکہ مزید 18 فیصد پاکستانیوں کاغربت کی لکیر سے نیچے جانا معاشی تباہی وبربادی کے اثرات ہیں،نوازشریف نے مہنگائی کے جن کو بوتل میں بند کیا تھا،موجودہ حکومت نے اسے آزادکرکے آدم خوردیو میں بدل دیا۔ انہوں نے کہاکہ نالائق، نااہل اورکرپٹ ٹولے کا 11000ارب کا قرض اڑدہا بن کر معیشت اور عوام کو نگل رہا ہے،حکمران ٹولہ نہ صرف ملی بھگت سے کرپشن کررہا ہے بلکہ سنگدلی کی حد تک نالائق اور بے حس بھی ہے،مہنگائی کے اس جہنم میں قوم بالخصوص غریب ترین لوگ کیسے زندہ رہیں گے؟۔ انہوں نے کہاکہ غریب بجلی گیس کے بل دے تو بچوں کی فیس رہ جاتی ہے، والدین کا علاج کرائے تو کھائے کیا؟،ظلم کی یہ انتہائی قہرالٰہی کو دعوت دینے کے مترادف ہے۔ انہوں نے کہاکہ غریب، بیروزگار خود کشی کررہے ہیں، سفید پوش طبقات کا عزت سے رہنا ناممکن بنادیاگیا ہے۔

موضوعات:شہبازشریف