لاہور (آئی این پی ) عوامی مسلم لیگ کے سربراہ اور وفاقی وزیر ریلوے شیخ رشید احمد نے مسلم لیگ (ن) کے رہنما اور سابق وزیر ریلوے سعدرفیق کو اداروں کا مخبر قراردیدیا اور کہاہے کہ اگر سعد رفیق کی ریلوے میں کارکردگی کی سینئر صحافی ہارون رشید نے تعریف کی ہے تو کیا وہ آسمان سے اترا ہے ۔ ہفتہ کو یہاں پریس کانفرنس کے دوران جب ایک صحافی نے ان سے سوال کیا کہ سینئر صحافی ہارون رشید نے بطور ریلوے سعد رفیق کی کارکردگی کی تعریف کی ہے جس پر

شیخ رشید سیخ پا ہوگئے اور کہاکہ ہارون رشید آسمان سے نہیں اتر ا بس میرا اتنا ہی جواب ہے ۔صحافی نے دوبارہ سوال کیاکہ سعدرفیق نے آپ پر الزام لگایاہے کہ آپ اداروں کے مخبر ہیں جس پر شیخ رشید نے کہاکہ مجھے پتہ ہے کہ آپ نے یہ کس کے کہنے پر یہ سوال کیاہے وہ مخبر ہے اور میں خانہ کعبہ گیا ہو ں اور خانہ کعبہ کو گواہ بناکرکہتاہوں کہ وہ مشرف دور میں بھی اداروں کا مخبرتھا اور آج بھی مخبر ہے ، شیخ رشید نے غصے میں آکر کہاکہ اب آپ کی تسلی ہوگئی ہے۔

موضوعات:شیخ رشید احمد