اسلام آباد(مانیٹرنگ ڈیسک) اقوام متحدہ کی ایک قرار داد کے تحت جاری کیے گئے صدارتی آرڈیننس کے معیاد کے خاتمے کے بعد حافظ سعید کی سربراہی میں چلنے والی جماعت الدعوہ اور فلاح انسانیت فائونڈیشن کالعدم جماعتوں کی فہرست میں نہیں رہیں۔یہ بات اس وقت سامنے آئی ہے جب اسلام آباد ہائی کورٹ میں حافظ سعید کی جانب سے دائر درخواست کی سماعت کے دوران ان کے وکیل نے عدالت کوآگاہ کیا کہ صدارتی آرڈیننس کی معیاد ختم ہوچکی ہے اور اس کی توسیع نہیں ہوئی۔درخواست گزار نے

صدارتی آرڈیننس کو عدالت میں چیلنج کیا تھا جس کے تحت ان تنظیموں پر اقوام متحدہ کی سلامتی کونسل کی واچ لسٹ میں شامل ہونے پر پابندی عائد کردی گئی تھی۔واضح رہے کہ سابق صدر ممنون حسین نے رواں سال فروری میں جماعت الدعوہ اور فلاح انسانیت فائونڈیشن کو کالعدم قرار دینے کے لیے انسداد دہشت گردی ایکٹ 1997 میں ترمیم کی تھی جس کے تحت اقوام متحدہ کی سلامتی کونسل کی فہرست میں شامل انفرادی دہشت گردوں یا تنظیموں کو کالعدم قرار دیا گیا تھا۔

موضوعات:جماعت الدعوۃ حافظ سعید صدارتی آرڈیننس