لاہور (نیوز ڈیسک) آشیانہ اقبال سکینڈل میں گرفتار سابق ڈائریکٹر جنرل لاہور ڈویلپمنٹ اتھارٹی احمد چیمہ کی اہلیہ صائمہ چیمہ نے نیب میں طلبی کا اقدام لاہور ہائیکورٹ میں چیلنج کردیا،عدالت نے چیئرمین نیب کو نوٹس جاری کرتے ہوئے دس روز میں جواب طلب کر لیا۔ گزشتہ روز لاہور ہائیکورٹ کے جسٹس کاظم رضا شمسی اورجسٹس علی باقر نجفی پر مشتمل دو رکنی بنچ نے صائمہ چیمہ کی درخواست پر سماعت کی، عدالت میں صائمہ احد چیمہ اور ان کے وکیل اعظم نذیر تارڑ

پیش ہوئے۔درخواست گزار کا کہنا تھا کہ ان کے شوہر کا مبینہ فراڈ سے کوئی تعلق نہیں، حکام آئے روز طلب کر کے نیب آفس میں بٹھائے رکھتے ہیں، انہیں نیب میں پیش ہونے کے لیے مشکلات کا سامنا ہے۔احد چیمہ کی اہلیہ صائمہ احد چیمہ نے استدعا کی کہ عدالت نیب کو غیر قانونی ہراساں کرنے سے روکے، نیب کو انکے خلاف شکایات کا ریکارڈ پیش کرنے کا حکم بھی دے۔جس پر فاضل عدالت نے چیئرمین نیب کو نوٹس جاری کرتے ہوئے دس روز میں جواب طلب کرلیا۔

موضوعات:احمد چیمہ کی اہلیہ صائمہ چیمہ