اسلام آباد (نیوز ڈیسک) چیئرمین آرمی الیکشن سپورٹ سنٹر (AESC) لیفٹیننٹ جنرل حمود الزمان خان نے چیف الیکشن کمشنر جسٹس سردار محمد رضا سے الیکشن کمیشن سیکرٹریٹ میں ملاقات کی جس میں عام انتخابات 2018ء کیلئے سیکیورٹی انتظامات اور پاک فوج کے تعاون پر بات چیت ہوئی۔الیکشن کمیشن کی جانب سے جاری بیان کے مطابق لیفٹیننٹ جنرل حمود الزمان خان نے چیف آ ف آرمی سٹاف جنرل قمر جاوید باجوہ کی جانب سے چیف الیکشن کمشنر کو یقین دہانی کرائی کہ پاک فوج

آئین پاکستان کے تحت الیکشن کمیشن کو ملک میں صاف ، شفاف اور غیر جانبدارانہ انتخابات منعقد کرانے میں مکمل تعاون فراہم کرے گی ۔ چیف الیکشن کمشنر کو یہ یقین دہانی بھی کرائی گئی کہ انتخابات میں حالات کو ساز گار بنانے کیلئے ہر ممکن تعاون فراہم کیا جائیگا۔ چیف الیکشن کمشنر نے پاک فوج کے عزم کو سراہتے ہوئے توقع ظاہر کی کہ تمام صوبائی حکومتیں بھی صاف ،شفاف اور غیر جانبدارانہ انتخابات کرانے میں الیکشن کمیشن کو بھر پور تعاون فراہم کریں گی۔

موضوعات:الیکشن کمشنر جسٹس سردار محمد رضا