کراچی(این این آئی)پاکستان پیپلزپارٹی کے چیئرمین بلاول بھٹو زرداری نے کہاہے کہ معصوم بچوں نے قربانی دے کر قوم کے ضمیر کو جگا دیا تین سال گزر گئے متاثرین کے مطالبہ پر جوڈیشنل انکوائری تک نہ ہوسکی۔متاثرین کوانصاف نہ مل سکا ، آج بھی مائیں سوال کرتی ہیں دہشتگردی کی آبیاری کون کررہاہے؟۔سانحہ اے پی ایس کی تیسری برسی پر چیئرمین پیپلزپارٹی بلاول بھٹوزرداری نے سماجی رابطے کی

ویب سائٹ ٹوئٹر پر اپنے پیغام میں کہا کہ تین سال بعد بھی متاثرین کے مطالبے پر جوڈیشنل انکوائری نہ ہوسکی،متاثرین کوانصاف نہ مل سکا، حکومت نیشنل ایکشن پلان کے نفاذمیں ناکام رہی جبکہ ایسے واقعات دوبارہ نہ ہوں یہ بات یقینی بنانے میں بھی ناکام ہیں۔بلاول بھٹوزرداری نے کہاکہ شہید بی بی کا بیٹا شہدا کے خون کے ایک ایک قطرے کا وارث ہے، دہشتگردی کے خلاف شہیدبی بی کا بیٹا آواز نہیں اٹھائے گا تو کون اٹھائے گا۔انہوں نے

کہا کہ ماں کی گود اجاڑنے والے دہشتگردوں کا مقابلہ جاری رہے گا، اپنے بچوں کو لندن کی محفوظ پناہ گاہوں میں رکھنے والے قوم کے ہمدرد نہیں،ہم اپنی دو نسلوں کی قربانی دینے کے باوجود میدان میں ہیں۔انہوں نے کہاکہ سب نے اپنے بچے بیرون ملک چھپائے ہوئے ہیں، ہم قوم کے ساتھ جینے مرنے کا عہد رکھتے ہیں، ہم ان کیلئے بہترکرسکتے ہیں۔

موضوعات:بلاول بھٹو زرداری