مسلم کانفرنس بلدیاتی انتخابات کیلئے پوری طرح تیار ہے، سردار عتیق احمد خان

  جمعرات‬‮ 14 ستمبر‬‮ 2017  |  17:04

مظفر آباد (این این آئی) آل جموں وکشمیر مسلم کانفرنس کے صدر و سابق وزیراعظم سردار عتیق احمد خان نے کہا ہے کہ مسلم کانفرنس بلدیاتی انتخابات کیلئے پوری طرح تیار ہے ۔ آزاد کشمیر میں مقامی حکومتوں کے قیام میں حکومتی لیت و لعل ، ریشہ دوانیوں ، قبیلائی اور جماعتی پسند اور ناپسند کی بنیاد پر حلقہ بنیدوں کی مذمت کرتے ہیں ۔ ان خیالات کا اظہار انہوں نے گزشتہ روز حلقہ 2لچھراٹ میں اپنے دورے کے دوران گھن چھتر،بانڈی فتح جنگ ، ائیرپورٹ سمیت مختلف مقامات پر کارکنوں سے گفتگو کرتے ہوئے کیا۔ انہوں نے کہا کہ

غیر جماعتی انتخابات قبول کئے جائیں گے اور نہ ہی مرحلہ وار ناٹک چلے گا۔ آزاد کشمیر کی حکومت تمام سیاسی جماعتوں کو اعتماد لیکر نئی مردم شماری کے مطابق حد بندیوں کو حتمی شکل دے اور نادرا سے جاری ہونیوالے ڈیٹا کے مطابق انتخابی فہرستوں کو اپ ڈیٹ کرکے انتخابی شیڈول جاری کرے ۔ سردار عتیق احمد خان نے کہا کہ مختلف علاقوں میں مختلف جماعتوں کی طرف سے نئی حلقہ بندیوں کے بارے میں کی گئی شکایات کا ازالہ کیا جائے ۔ آزاد کشمیر حکومت بلدیاتی انتخابات میں ناکامی کے خوف سے حلقہ بندیوں میں دھاندلی کرکے مطلوبہ نتائج حاصل کرنا چاہتی ہے ۔ جسے عوامی طاقت سے ناکام بنایا جائیگا۔ حکومت آزاد کشمیر درحقیقت غیر منصفانہ حلقہ بندیوں کا سلسلہ شروع کرکے بلدیاتی انتخابات سے راہ فرار اختیار کرنا چاہتی ہے ۔ انہوں نے کارکنوں سے کہاکہ وہ بلدیاتی انتخابات کی تیاریاں کریں ۔ اس موقع پر ان کے ہمراہ سابق وزیر حکومت پیر سید غلام مرتضیٰ گیلانی ، خواجہ محمد شفیق ، اعجاز عباسی ، ، سید تصور موسوی ، یاسر نقوی ، سجاد انور عباسی ، سجاد سلہریا ، وقاص گیلانی، سیاف اعوان ، میر علی بہادر ‘ میر عبدالقیوم ، میر جنید ، سجاد سلہریا ، میر نویدتھے۔ سردار عتیق احمد خان جب ائیر پورٹ ، گھن چھتر پہنچے تو کارکنوں نے ان کابھرپور استقبال کیا اور پھولوں کی پتیاں نچھاور کیں اور پھولوں کے گلدستے بھی پیش کئے ۔ فضا نعروں سے گونج اٹھی ۔

موضوعات:

آج کی سب سے زیادہ پڑھی جانے والی خبریں