اسلام آباد (مانیٹرنگ ڈیسک ) پاکستان نے اسلامی عسکری اتحاد میں باقاعدہ شمولیت کا فیصلہ کرتے ہوئے ایک بریگیڈ آرمی سعودی عرب بھیجنے کا فیصلہ کر لیا ہے، سابق پاکستانی آرمی چیف جنرل راحیل شریف مئی میں اسلامی عسکری اتحاد کے بانی کمانڈر انچیف کے طور پر ذمہ داریاں سنبھال لیں گے، نجی ٹی وی اینکر کا دعویٰ۔ تفصیلات کے مطابق نجی ٹی وی کے معروف صحافی

کامران خان نے دعوی کیا ہے کہ حکومت پاکستان نے سابق آرمی چیف جنرل (ر) راحیل شریف کو سعودی قیادت میں اتنالیس رکنی فوجی اتحاد کی سربراہی کے لئے گرین سگنل دیتے ہوئے پاکستان آرمی کا ایک بریگیڈ سعودی عرب بھیجنے کا فیصلہ کرلیا ہے۔جنرل (ر) راحیل شریف ذاتی حیثیت میں اسلامی اتحادی فوج کی سربراہی سنبھالیں گے۔ فورسز کی تعداد اور ہیڈکوارٹرز کہاں ہو گا، تمام معاملات بھی فائنل کر لئے گئے ہیں تاہم وفاقی وزیر دفاع خواجہ آصف کا کہنا ہے کہ حتمی فیصلہ نہیں ہوا ہمارا باہمی تعاون صرف دہشتگردی کیخلاف ہے۔ واضح رہے کہ اس سے قبل آرمی چیف جنرل قمر جاوید باجوہ اورسعودی آرمی چیف جنرل عبدالرحمان بن صالح کے درمیان دسمبر2016 میںجنرل قمر جاوید باجوہ کے سعودی عرب کے3روزہ سرکاری دورے کے دوران پاکستانی فوج کی سعودی عرب میں تعیناتی کے حوالے سے گفتگو ہو چکی ہے ۔ میـڈیا رپورٹس کے مطابق حوثی باغیوں سے مقابلہ کرنے کیلئے پاکستانی فوجی دستوں کو سعودی عرب بھیجنے اور جنوبی سرحد پر تعیناتی کے حوالے سے دونوں فوجی سربراہوں کے درمیان معاملات زیر بحث آئے تھے جبکہ اس حوالے سے دو سال قبل پاکستانی پارلیمنٹ حوثی باغیوں سے لڑنے کیلئے پاکستان کی اسلامی عسکری اتحاد کے تحت تعاون کی سعودی درخواست مسترد کر چکی ہے۔

موضوعات:اسلامی عسکری اتحاد حوثی باغی راحیل شریف سعودی عرب فوجی دستے