اسلام آباد(مانیٹرنگ ڈیسک)پاک فوج نے پی ایس ایل فائنل کے لاہور میں انعقاد کیلئے بھرپور تعاون فراہم کرنے کا اعلان کر دیا، دہشتگردوں کا نیٹ ورک بے نقاب کرنے کا عزم۔پاک فوج کےشعبہ تعلقات عامہ کے مطابق آرمی چیف جنرل قمر جاوید باجوہ کی زیر صدارت کور ہیڈکوارٹر لاہور میں سکیورٹی کے متعلق اجلاس ہوا جس میں کور کمانڈر لاہور اور حساس اداروں نے لاہور دھماکے پر آرمی چیف کوبریفنگ دی

جب کہ آرمی چیف نے لاہور دھماکےکے کرداروںکی نشاندہی اور مشکوک افغان باشندوں کی گرفتاری کو سراہا ہے۔ اس موقع پر پاک فوج کے سربراہ نے ہدایت دی کہ دہشتگردوں کے نیٹ ورک کے خاتمے کی کوششیں تیز کی جائیں اور اس نیٹ ورک کو مکمل طور پر بے نقاب کیا جائے ۔ انہوں نے کہا کہ دہشتگرد ایسے واقعات کے ذریعے ہمارے قومی عزم کو متزلزل نہیں کر سکتے۔ دہشتگردوں کے ماسٹرزمائنڈ ، فنانسرز ، منصوبہ سازوں اور سہولت کاروں کا خاتمہ کر کے دم لیں گے اور انہیں ڈھونڈ کر قانون کے کٹہرے میں لائیں گے اور ان سے حساب لیا جائے گا جبکہ ملکی و غیر ملکی تمام دہشتگردوں کے خلاف آپریشن بلا امتیاز جاری رکھا جائے گا۔ آرمی چیف جنرل قمر جاوید باجوہ کا کہنا تھا کہ ضرب عضب سے حاصل کامیابیوں کو ضائع نہیں ہونے دیں گے اور قوم کے ساتھ مل کر دہشتگردوں کی غیر انسانی وحشیانہ سوچ کو اپنے مضبوط عزم سے شکست دیں گے۔ آرمی چیف نے پی ایس ایل کے لاہور میں ہونے والے فائنل کیلئے بھی بھرپور تعاون کا اعلان کرتے ہوئے کہا کہ پاک فوج پی ایس ایل فائنل کے لاہور میں انعقاد کیلئے ہر قسم کی مدد دے گی اور فائنل شیڈول کے مطابق یقینی بنایا جائے گا۔ اس سے قبل آرمی چیف جنرل قمر جاوید باجوہ نے گنگا رام ہسپتال میں دھماکے کے زخمیوں کی عیادت بھی کی ہے جب کہ انہوں نے ڈی آئی جی ٹریفک شہید کیپٹن احمد مبین کے گھر جا کر ان کے اہل خانہ سے تعزیت بھی کی ۔ اس موقع پر آرمی چیف نے شہید کی والدہ کو یقین دہانی کرائی کہ احمد مبین سمیت دیگر شہدا کی قربانیاں رائیگاں نہیں جانے دی جائیں گی۔

موضوعات:اجلاس بریفنگ پی ایس ایل فائنل کور ہیڈ کوارٹر لاہور