ایبٹ آباد (این این آئی)انگلینڈ سے آئی انشورنس ٹیم نے حویلیاں میں طیارہ حادثہ کے مقام کا دورہ کیا جبکہ حادثے میں مرنے والے چینی باشندے کے عزیزوں نے بھی حادثہ کی جگہ پہنچ کر رسومات ادا کیں ۔

میڈیا رپورٹ کے مطابق انگلینڈ کی انشورنس ٹیم کے ارکان نے طیارہ حادثے کی جگہ کا معائنہ کیا اور تصاویر بنائیں ٗحادثے میں مرنے والے چینی باشندے ہان کوئن کے ورثا نے بھی آخری رسومات ادا کیں اور ایک منٹ کی خاموشی اختیار کی۔گاؤں بٹولی کے لوگوں کی جانب سے جائے حادثہ پر چوتھے دن بھی قرآن خوانی کی گئی۔

مقامی لوگوں کی جانب سے جائے حادثہ پر تعینات پولیس اہل کاروں اور دیگر افراد کی کھانے اور چائے سے تواضع کی گئی مقامی افراد کا کہنا ہے کہ جب تک جہاز کا ملبہ اٹھایا نہیں جاتا قرآن خوانی اور مہمانوں کی تواضع کا سلسلہ جاری رہے گا۔

موضوعات:انکشاف چینی باشندے طیارہ حادثہ