کراچی(این این آئی)پاکستان کی سب بڑی دفاعی نمائش آئیڈیاز2016 کا آغاز آج(منگل) سے کراچی ایکسپوسینٹر میں ہوگا،جوچارروز تک جاری رہے گی ۔منتظمین کے مطابق نمائش کی تمام ترتیاریاں مکمل کرلی گئی ہیں۔نمائش کا افتتاح وزیر اعظم میاں محمدنوازشریف کریں گے۔صدرمملکت پاکستان کی تینوں مسلح افواج کے سربراہان ،چیئرمین جوائنٹ چیف آف اسٹاف کمیٹی،وفاقی وزیر دفاع، وفاقی وزیر دفاعی پیداوار سمیت دیگروفاقی وزراءنمائش میں شرکت کریں گے۔پاکستانی فوج کے سربراہ جنرل رحیل شریف نمائش کے آخری روز ایکسپوسینٹرکا دورہ کریں گے ۔نمائش میں 43ممالک کے 90 وفود شرکت کررہے ہیں، مجموعی طور پر 261 غیرملکی اور 157 پاکستانی فرمز شریک ہوں گی جب کہ 34 ممالک کی 418 فرمز نمائش میں اپنی مصنوعات پیش کریں گی۔نمائش میں الخالدٹینک ، بیٹل ٹینک، جے ایف 17 تھنڈر طیارے ، سپرمشاق ، کے 18 ائیرکرافٹ اور فاسٹ اٹیک کرافٹ میزائل بوٹس بھی رکھی گئی ہیں۔اس بارایکسپوسینٹرکے8 ہالزمیں نمائش کی جارہی ہے کیوں کہ گزشتہ نمائش کے مقابلے میں 9 ممالک زیادہ شرکت کررہے ہیں،نمائش میں14 ایم او یوز پردستخط کئے جائیں گے۔ نمائش میں سی پیک کی افادیت کو بھی اجاگرکرنے کا فیصلہ کیا گیا ہے جس کے لئے خصوصی اسٹال قائم کیے گئے ہیں۔
اسلام آباد (آئی این پی) وزیر اعظم نواز شریف (آج) منگل کو کراچی کا ایک روزہ دورہ کریں گے‘ بین الاقوامی نمائش ایکسپو2016کا افتتاح کریں گے۔ تفصیلات کے مطابق وزیر اعظم نواز شریف (آج) منگل کو ایک روزہ دورے پر کراچی پہنچیں گے۔ اپنے دورے کے موقع پر وہ کراچی میں منعقدہ دفاعی ساز وسامان سے متعلق بین الاقوامی نمائش ایکسپو 2016 کا افتتاح کریں گے۔

وزیراعظم اپنے دورہ میں گورنر سندھ سعید الزماں صدیقی کی عیادت بھی کریں گے۔ذرائع کے مطابق وزیر اعظم نواز شریف سے وزیر اعلیٰ سندھ مراد علی شاہ بھی ملاقات کریں گے جس میں کراچی آپریشن اور ہ وفاقی حکومت کے تعاون سے بننے والے گرین لائن بس منصوبے پر پیش رفت کا جائزہ لیا جائے گا

موضوعات:گورنر سندھ نواز شریف