لاہور (این این آئی ) لاہور ایئرپورٹ پر کسٹمز حکام نے کارروائی کے دوران جاسوسی کے لیے استعمال ہونے والی جدید عینک پکڑ لی، مسافر کے سامان سے دیگر مشکوک سامان بھی برآمد ہوا ہے ، مسافر کو گرفتار کر کے تحقیقات کا آغاز کر دیا گیا ۔ بتایا گیا ہے کہ لاہور ایئرپورٹ پر تعینات کسٹمز حکام کے مطابق چائنہ سے لاہور پہنچنے والے بھکر کے رہائشی مسافر محمد ابوبکر کے سامان کی تلاشی کے دوران ایک ایسی قیمتی عینک برآمد کی گئی جو جدید آلات سے لیس اور جاسوسی کے لیے استعمال کی جاتی ہے۔
چائنہ سے مہنگی عینک منگوا کر اسے اسلام آباد بھجوایا جانا تھا جس کا اعتراف مسافر ابوبکر نے کر لیا ہے۔کسٹمز حکام نے مسافر کے کوائف ڈیوٹی رجسٹر میں درج کرنے سمیت عینک ضبط کرلی۔ذرائع کے مطابق مسافر کے سامان سے جاسوس کے لیے استعمال ہونے والی عینک سمیت دیگر مشکوک سامان بھی برآمد ہوا ہے جسے حساس اداروں کی کلیئرنس کے بغیر جانے کی اجازت نہیں دی جا سکتی۔ذرائع کے مطابق مسافر سے ایسا سامان برآمد ہوا ہے جو حساس اداروں کی اجازت کے بغیر کلیرنس نہیں دی جاسکتی، حکام نے ضبط کیے جانے والے سامان اور مسافر کے متعلق تحقیقات کا آغاز کر دیا ہے ۔

موضوعات:لاہور ائیرپورٹ