اسلام آباد(این این آئی)وزیر اعظم محمد شہباز شریف نے یونان کے قریب بحیرہ روم میں کشتی الٹنے کے واقعے کی انکوائری کی ہدایات کر دی۔وزیر اعظم نے انسانی اسمگلنگ میں ملوث افراد کے خلاف گھیرا تنگ کرنے اور قانون نافذ کرنے والے اداروں کو لوگوں کو جھانسہ دے کر خطرناک اقدامات پر مجبور کرنے والے انسانی اسمگلروں کی نشاندہی کرنے کی ہدایت کی۔

انہوں نے انسانی اسمگلنگ جیسے گھنائونے جرم میں ملوث ایجنٹس کے خلاف فوری کریک ڈائون اور انہیں قرار واقعی سزا دینے کی بھی ہدایت کی۔وزیر اعظم کی ہدایت پر ایف آئی اے نے ڈی آئی جی عالم شنواری کو واقعے میں جاں بحق ہونے والوں اور زخمیوں کی معلومات و سہولت کے لیے فوکل پرسن مقرر کر دیا۔چیف سیکریٹری آزاد جموں و کشمیر نے بھی پاکستانی سفارتخانے اور یونانی حکام سے رابطے اور جاں بحق و زخمی ہونے والوں کی معلومات کے لیے فوکل پرسن تعینات کر دیا۔وزیر اعظم محمد شہباز شریف نے بحیرہ روم میں کشتی الٹنے کے واقعے میں پاکستانیوں کے جاں بحق ہونے پر گہرے دکھ اور رنج کا اظہار کیا ۔ انہوں نے کہاکہ مجھ سمیت پوری قوم کی ہمدردیاں جاں بحق ہونے والوں کے اہل خانہ کے ساتھ ہیں۔وزیر اعظم نے یونان میں پاکستانی سفارتخانے کو واقعے میں ریسکیو کیے جانے والے 12پاکستانیوں کی دیکھ بھال کی ہدایت کی ۔واضح رہے کہ یونان کے قریب بحیرہ روم میں تارکین وطن کی کشتی ڈوبنے سے 79افراد ہلاک ہوگئے تھے۔جاں بحق ہونے والوں میں سے27پاکستانیوں کی شناخت ہوگئی جبکہ 50سے زائد لاپتہ ہیں۔

موضوعات:وزیر اعظم