اسلام آباد (مانیٹرنگ ڈیسک) وزیراعظم پاکستان عمران خان امریکہ کے کامیاب دورے کے بعد رات ڈیڑھ بجے پاکستان پہنچ گئے، ائیرپورٹ پر ان کا شاندار استقبال کیا گیا، ائیرپورٹ پر کارکنوں کی بڑی تعداد موجود تھی، اس کے علاوہ فردوس عاشق اعوان، پرویز خٹک، فواد چوہدری، غلام سرور خان، مراد سعید، علیم خان اور جہانگیر ترین بھی اس موقع پر موجود تھے،

اس موقع پر وزیراعظم عمران خان نے ائیرپورٹ پر خطاب کرتے ہوئے کہا کہ ہم پر اللہ تعالی کا خاص کرم ہے، پاکستان اسلام کے نام پر وجود میں آیا، وزیراعظم عمران خان نے کہا کہ مدینہ کے اصولوں اور اقبال و قائداعظم کے فرمودات کے مطابق پاکستان کو عظیم ملک بنائیں گے، انہوں نے کہا کہ لٹیروں سے ایک ایک پیسے کا حساب لوں گا، نہ کبھی خود جھکا ہوں نہ قوم کو جھکنے دوں گا، وزیراعظم نے کہا کہ وعدہ کرتا ہوں، قوم کو مایوس نہیں کروں گا۔ شاندار استقبال کرنے پر وزیراعظم عمران خان نے کارکنوں کا شکریہ ادا کیا۔ انہوں نے اپنے خطاب میں مزید کہا کہ بھیک مانگنے اور کسی طاقتور کے سامنے جھک کر کوئی قوم نہیں بنتی، جو اپنی عزت کرتا ہے دنیا اسی کی عزت کرتی ہے، انہوں نے کہا کہ اداروں میں اصلاحات لائیں گے، نوجوانوں کو روزگار دیں گے۔ وزیراعظم عمران خان نے کہاکہ اس ملک کو چوروں نے مقروض کرکے مشکل حالات میں چھوڑ دیا، لٹیروں سے ایک ایک روپے کا حساب لیں گے، وزیراعظم نے کہاکہ غریب لوگوں کا پیسہ چوری کرکے بیرون ملک منتقل کیا گیا۔ انہوں نے کہا کہ غریبوں کا پیسہ وطن واپس لانے کے لیے بیرون ملک درخواست کی ہے کہ ہماری مدد کریں، انہوں نے کارکنوں سے خطاب کرتے ہوئے کہا کہ ایک وقت آئے گا جب دنیا بھر میں پاکستانی پاسپورٹ کی عزت ہوگی۔

موضوعات:عمران خان