ملتان(آن لائن) پاکستان مسلم لیگ (ن)کے سینئر رہنما جاوید ہاشمی نے پیش گوئی کی ہے کہ قائد مسلم لیگ (ن) نواز شریف کو احتساب عدالت کی جانب سے فلیگ شپ اور العزیزیہ کیس میں ہر قیمت پر سزا ہو گی کیونکہ ادارے انہیں (کیسز ) کو غلط ثابت نہیں ہونے دیں گے ۔اتوار کے روز میڈیا سے بات چیت کرتے ہوئے رہنما مسلم لیگ (ن) جاوید ہاشمی کا کہنا تھا کہ نیب کا مقصد سیاستدانوں سے ان کی وفاداریاں تبدیل کروانا ہے۔

اگر نواز شریف کو سزا ہوئی تو میں یہ فیصلہ منظور نہیں کروں گا۔جنوبی پنجاب صوبہ بنانے سے متعلق ان کا کہنا تھا کہ یہ منصوبہ آخری مراحل میں ہے اور صرف پاکستان تحریک انصاف کی حکومت کے یو ٹرن کی وجہ سے یہ کام رک سکتا ہے ،تاہم اس معاملے پر حکومت کے لیے یو ٹرن لینا آسان نہیں ہوگا۔شہباز شریف کی جنوبی پنجاب صوبہ بنانے کے مطالبے کے حوالے سے جاوید ہاشمی نے کہا کہ انہوں نے اس کی پہلے ہی پیش گوئی کردی تھی۔انہوں نے کہا کہ پارلیمنٹ میں تقریباً تمام جماعتوں نے اس کی حمایت کا اعلان کردیا ہے۔ان کا کہنا تھا کہ شہباز شریف پبلک اکاؤنٹس کمیٹی (پی اے سی )کے سربراہ بننے کے بعد قومی اسمبلی کے اجلاس کے لیے خود اپنے پروڈکشن آرڈر دے سکیں گے۔انہوں نے اظہار برہمی کرتے ہوئے کہا کہ عمران خان دنیا بھر میں تقاریر کر رہے ہیں ،تاہم قومی اسمبلی کے اجلاس سے غائب ہیں۔ان کا کہنا تھا کہ عمران خان پارلیمانی کے بجائے صدارتی نظام کی حمایت کرتے ہیں وہ اس قابل ہی نہیں کہ اسمبلی میں سوالات کا جواب دے سکیں۔جاوید ہاشمی نے کہا کہ میڈیا کو سینسر شپ کا سامنا اور میڈیا ورکرز جنہوں نے اس انڈسٹری کو منافع بخش بنایا کونوکریوں سے نکالا جارہا ہے۔ان کا کہنا تھا کہ میڈیا ورکرز کو یا تو نوکریوں سے نکالا جارہا ہے یا ان کی تنخواہ کاٹی جارہی ہے، میڈیا کی آزادی کے لیے جدو جہد کرنے والے افراد کی تعداد میں کمی آرہی ہے ۔

موضوعات:نوازشریف