اسلام آباد (آئی این پی)وزیراعظم عمران خان نے کہا ہے کہ چینی قونصلیٹ پر ناکام دہشت گرد حملہ بے مثال تجارتی معاہدوں کا رد عمل ہے، ایسے واقعات پاکستان اور چین کے تعلقات کو کمزور نہیں کر سکتے، جان کی قربانی دینے والے بہادر اہلکاروں کو سلام پیش کرتے ہیں۔ جمعہ کو سماجی رابطوں کی ویب سائیٹ پر وزیراعظم عمران خان نے اپنے ٹوئیٹر پیغام میں چینی قونصلیٹ پر فائرنگ کے واقعے کی مذمت اور واقعے کی مکمل تحقیقات کی ہدایت کرتے ہوئے کہا کہ واقعے کے پیچھے چھپے عناصر کو بے نقاب کیا جائے،

ایسے واقعات پاکستان اور چین کے تعلقات کو کمزور نہیں کر سکتے، واقعہ پاک چین معاشی اور اسٹرٹیجک تعاون کے خلاف سازش ہے، پاک چین دوستی ہمالیہ سے بلند اور سمندروں سے گہری ہے، چینی قونصلیٹ پر ناکام دہشت گرد حملہ بے مثال تجارتی معاہدوں کا ردعمل ہے، دہشت گرد کبھی کامیاب نہیں ہوں گے، جان کی قربانی دینے والے بہادر اہلکاروں کو سلام پیش کرتے ہیں، قوم کو شہیدوں اور ان کے ساتھیوں کی بہادری پر فخر ہے، کراچی پولیس اور رینجرز نے غیر معمولی جرات کا مظاہرہ کیا، حملہ متاثرین اور ان کے خاندان کیلئے دعا گو ہیں۔