اسلام آباد(مانیٹرنگ ڈیسک) قومی اسمبلی میں عید میلاد النبی صلی اللہ علیہ وسلم کی مناسبت سے حضور اکرمﷺ کو خراج عقیدت پیش کر نے کی قرارداد متفقہ طور پر منظور کرلی گئی۔تفصیلات کے مطابق آج قومی اسمبلی کا اجلاس ڈپٹی اسپیکر قاسم سوری کی سربراہی میںپارلیمنٹ ہائوس اسلام آباد کے ایوان میں منعقد ہوا ۔اجلاس کے دوران وزیر مملکت علی محمد خان نے عید میلاد النبی صلی اللہ علیہ وسلم کی مناسبت سے حضور اکرم ﷺکو خراج عقیدت پیش کر نے کی قرارداد پیش کی۔قرارداد میں کہا گیا

کہ نبی اکرم ﷺعالم انسانیت کے لئے نبی مہربان ہیں، یہ ایوان نبی اکرمﷺ کے یوم ولادت پر خوشی کا اظہار کرتا ہے، یہ ہمارے لئے سعادت ہے کہ ہم نبی اکرمﷺ کی امت میں سے ہیں‘ ایوان نے متفقہ طور پر قرارداد منظور کرلی۔ قومی اسمبلی میں امیر تبلیغی جماعت حاجی عبدالوہاب کے لئے دعائے مغفرت بھی کئی گئی۔ واضح رہے کہ آج کے اجلاس میں اپوزیشن لیڈر اور مسلم لیگ ن کے صدر شہباز شریف بھی سپیکر قومی اسمبلی کی جانب سے جاری ہونیوالے پروڈکشن آرڈر پر اجلاس میں شرکت کی۔

موضوعات:خراج عقیدت قرارداد علی محمد خان نبی کریمﷺ