اسلام آباد (مانیٹرنگ ڈیسک) میاں نواز شریف کے کیے جانے والے ٹیسٹوں کی رپورٹ آ گئی ہے، ایک نجی ٹی وی چینل کی رپورٹ کے مطابق ان رپورٹس کے مطابق میاں نواز شریف کو کوئی بھی شدید نوعیت کی تکلیف نہیں ہے۔ ان میڈیکل رپورٹس کے مطابق میاں نواز شریف کے خون اور پیشاب کے ٹیسٹ نارمل ہیں، تاہم ان کے خون میں یوریا کی مقدار معمول سے تھوڑی زیادہ ہے۔ سابق وزیراعظم میاں نواز شریف کو نرم غذا، پرسکون ماحول اور سابقہ ادویات جاری رکھنے کا مشورہ دیا گیا ہے اور کہا

گیا ہے کہ ان کے ذاتی معالج ان کی مناسب دیکھ بھال جاری رکھیں، واضح رہے کہ تمام ٹیسٹوں کی رپورٹ آنے کے بعد میاں نواز شریف کا دوبارہ معائنہ کیا جائے گا۔ نواز شریف کے خون کے مزید ٹیسٹ اور ایکو کارڈیالوجی کل ہو گی۔ ٹی وی رپورٹ کے مطابق میڈیکل بورڈ نے اڈیالہ جیل میں نواز شریف کا طبی معائنہ کرنے کے بعد انھیں فی الحال کہیں اور منتقل نہ کرنے کا مشورہ دیا تھا۔ اس حوالے سے جیل ذرائع کا بھی کہنا ہے کہ سابق وزیراعظم نواز شریف کو جیل میں ہی طبی امداد دی جائے گی۔

موضوعات:میاں نواز شریف